Për gati 30 minuta, Vitomir Mariciq nuk mori frymë.
Me fytyrën përmbys në një pishinë, i rrethuar nga spektatorë të shqetësuar, zhytësi kroat luftoi me dhimbjet therëse për të ripërcaktuar atë që mjekët mendonin se ishte e pamundur.
Kur më në fund doli në sipërfaqe, ai e kishte thyer rekordin e mëparshëm botëror Guinness për mbajtjen më të gjatë të frymëmarrjes nën ujë me gati pesë minuta.
“Kur zhytem, shkëputem plotësisht nga gjithçka, sikur të mos isha fare aty”, tha kroati.
“Këtë herë, pata vështirësi dhe në gjysmë të rrugës mendova të hiqja dorë.”
Përpara zhytjes rekord, Mariciq thithi thellë oksigjen të pastër për 10 minuta për ta përgatitur trupin e tij të qëndronte për një kohë të gjatë pa ajër.
Mjeku i tij e vëzhgonte me ankth dhe pasiguri, ndërsa Mariciq luftonte drejt rekordit në një pishinë të vogël brenda një hoteli në qytetin bregdetar verior të Kroacisë, Opatija.
“Është diçka krejtësisht e panjohur për mjekësinë moderne”, tha pulmologu Igor Barkovic.
Por rekordi i Mariciq prej 29 minutash e tre sekondash pa oksigjen mund të hapë mundësi të reja, sipas ekspertit.
