Tatjana Vasiq Bozaxhieva është kandidatja për gjyqtare kushtetuese për të cilën ka debatuar sot Komisioni për zgjedhje dhe emërime. Ajo është propozuar nga shumica parlamentare, ndërsa sipas VMRO-DPMNE-së është kandidate e propozuar drejtpërdrejt nga ish-kryeministri Zoran Zaev.
Sipas deputetit Petar Risteski nga VMRO-DPMNE, qeveria ka nevojë për gjykatës të bindur dhe mendon se pikërisht për këtë arsye besimi në sistemin e gjyqësisë është vetëm 8%.
Deputeti nga radhët e shumicës parlamentare, Pançe Minov, tha se kolegët e tij nga opozita flasin me gojën plot për mosfunksionimin e institucioneve dhe sistemit gjyqësor në vend, ndërsa ata vetë po e bllokojnë punën.
Deri më tani është mbajtur debat për 2 kandidatë, prej të cilëve ka kaluar vetëm kandidati i propozuar nga LSDM-ja, Fatmir Skender, ndërsa profesoresha Rodna Zhivkova e propozuar nga VMRO-DPMNE nuk ka marrë mbështetje nga Komisioni.
Nga gjithsej 9 kandidatë, vetëm 3 duhet të zgjidhen për gjyqtarë kushtetues. Në mesin e kandidatëve të propozuar nga LSDM-ja është edhe prokurori republikan Ljubomir Joveski.
