Aleanca për Shqiptarët sot në një konferencë për media bëri apel që urgjentisht të hiqen 132 mijë të imputuarit pasi nuk janë të regjistruar në terren dhe gjithashtu u mungon përkatësia etnike, shtëpitë ose banesat ku jetojnë, profesioni, niveli i arsimimit, vendi i punës dhe shumë të dhëna të tjera, njofton Nistori.
“Kërkojmë nga Enti për Statistikë që urgjentisht për personat jorezident të tregojë edhe komunat e banimit në vend, ku ata kanë shtëpi ose banesa dhe për çdo vit kthehen dhe kontribuojnë në ekonominë vendore. Përfshirja e personave të imputuar pa përkatësi etnike nga njëra anë dhe mospublikimi i vendbanimit të personave nga diaspora kanë luajtur rol negativ në paraqitjen e përqindjes reale të bashkësive etnike në vend dhe me këtë rrezikohen të drejtat kolektive që gëzonim deri më tani. Konkretisht, përqindja e shqiptarëve në Kërçovë ka rënë nën 50% dhe me këtë rrezikohet përdorimi i flamurit kombëtar.”
Aleanca për Shqiptarët vazhdon me bindje të fortë të thotë se rezultatet e regjistrimit janë të manipuluara dhe këtë e dëshmon një fakt i pakontestueshëm për të cilin autoritetet do të duhet të japin sqarim.
“Nga rezultatet e publikuara kemi rreth 400 mijë persona deri në moshën 18 vjeçare, ndërsa në listën e votuesve të po të njëjtit vit, 2021, kemi 1.8 miljon votues. Nëse mblidhen votuesit dhe personat nën 18 vjet na rezulton të paktën 2 miljon e 200 mijë banorë, ndërsa nga regjistrimi u tha se banorët rezident dhe jo rezident janë gjithsej 2 milion e 90 mijë. Vetëm sipas të dhënave zyrtate mungojnë të paktën 100 mijë banorë.
Nëse Enti Shtetëror për Statistikë nuk korigjon këto parregullsi i kujtojmë se do të mbajnë përgjegjësi penale në bazë të nenit 49 të Ligjit për regjistrim ku parashihet të paktën 5 vite burg për këto manipulime.” /Nistori/