Kryetari i Lëvizjes Besa dhe kryetari i Komunës së Tetovës, Bilall Kasami në Kuvend ka dorëzuar deklaratë se po heq dorë nga mandati i deputetit dhe kërkon që të mos verifikohet.
“Unë, Bilall Kasami si kandidat i zgjedhur për deputet në Njësinë e Gjashtë Zgjedhore në zgjedhjet parlamentare 2024, me ndërgjegje të pastër dhe arsye të shëndoshë, të pa detyruar nga askush, nën përgjegjësinë e plotë morale, materiale dhe penale, deklaroj se heq dorë nga mandati i deputetit dhe kërkoj të mos më verifikohet mandati nga ana e Kuvendit të Republikës së Maqedonisë së Veriut”, qëndron në deklaratën e Kasamit të nënshkruar më 23 maj të vitit 2024, si pjesë e materialeve për seancën e nesërme konstituive të Kuvendit.
Kasami ishte kandidat për deputet nga Koalicioni VLEN.
Pasi të konstatohet dorëheqja e Kasamit nga pozita e deputetit, vendin e tij do ta zë deputeti i radhës në listën e Koalicionit VLEN, me të cilën kanë garuar në Njësinë Zgjedhore numër 6./Nistori/
