Pikërisht 10 ditë para seancës parlamentare për ndryshimet kushtetuese, e cila është caktuar për në 18 gusht, organet legjislative, ekzekutive dhe gjyqësore (si tre shtyllat e shtetit) janë në pushim vjetorë (veror). Praktikisht, menjëherë pas festës së Ilindenit më 2 gusht, deputetët, kryeministri dhe disa nga ministrat në qeveri, si dhe organet e drejtësisë, të cilat rregullisht bëjnë pushime në gjysmën e parë të gushtit, shkuan në pushime. Edhe presidenti i vendit ka bërë të ditur se do të bëjë pushime gjatë kësaj periudhe. Kryeparlamentari, Talat Xhaferi, tashmë ka konfirmuar se deputetët do të bëjnë pushime, gjë që mund të shihet nga faqja zyrtare e Parlamentit, ku deri më 18 gusht nuk është planifikuar asnjë aktivitet tjetër. Por më 18 gusht mbahet seanca e 123-të e Parlamentit, në të cilën në rend dite janë ndryshimet kushtetuese. Kjo praktikisht do të thotë se deputetët (të qeverisë dhe të opozitës) do të vijnë direkt nga plazhi, si të thuash, në seancën ku do të votohen ndryshimet kushtetuese, pasi kjo çështje i është referuar më parë Komisionit për çështje kushtetuese.
E ardhmja e Maqedonisë në BE është në pushime verore, thonë disa nga njohësit e proceseve politike në vend. Por sipas tyre, kjo është e arsyeshme sepse kjo është periudha e pushimeve vjetore. “Gjithë e dimë se kjo është periudhë e pushimeve vjetore, ashtu edhe për deputetët dhe ministrat. Ato 10 ditë që i shfrytëzojnë si pushim vjetorë, nuk ndikojnë në asnjë mënyrë në ndryshimet kushtetuese. Ndryshimet kushtetuese po zvarriten me muaj, 10 ditë pushim nuk ndryshon asgjë. Problemi do të jetë nëse pushimet i shfrytëzojnë pasi të fillon diskutimi. Në atë periudhë do të ishte e pakuptimtë mungesa nga seancat. Ndërsa, a po punohen në mënyrë sekrete për të “blerë” deputet në periudhë të pushimeve vjetore, kjo do të merret vesh së shpejti”, ka deklaruar për KOHA, Dimitar Hristov, politolog.
Kryetarja e grupit punues për ndryshime kushtetuese, Margarita Caca Nikollovska, duke iu referuar dorëheqjeve të kushtëzuara të ministrave të BDI-së, edhe nga këndvështrimi i saj, mendon se koha ende marshon drejt nesh. “E pranoj që duhet të ketë një debat më të gjerë, por në situatën e dhënë u vendos një kusht. Koha po ikën, më 18 gusht është caktuar seanca e Parlamentit”, thotë Nikolovska. Ndërkohë, në mungesë të një debati më të gjerë publik dhe profesional për ndryshimet kushtetuese, gjithçka zbret në njoftime dhe reagime të përditshme thuajse identike nga partitë politike. Në thelb, si pushteti ashtu edhe opozita po përsërisin qëndrimet e tyre të njohura pa tentuar të hapin një debat të përbashkët dhe thelbësor në interes të qytetarëve dhe shtetit.
Ndërkaq, analisti politik, Dame Çkatroski shprehet se nëse nuk votohen ndryshimet kushtetuese, asnjëra nga partitë më të mëdha nuk kanë plan B. “Në këtë fazë nuk ka gjasa që të ketë ndonjë zgjidhje dhe është mirë të shkohet në pushime. Dhe çdo zgjidhje apo moszgjidhje do të ndodhë një ose dy muaj pas pushimeve ose rreth nëntorit. Fakti që VMRO-DPMNE përsërit se nuk do të votojë për shkak të diktatit të Bullgarisë është i paqëndrueshëm. Ne aplikojmë për anëtarësim në BE, ata nuk aplikojnë askund, nëse nuk votohet për përfshirjen e bullgarëve në kushtetutë, vetëm do të shtyjmë fillimin e negociatave. Një situatë e tillë do të vononte një apo dy vjet, por do të futeshim në kaos politik. As LSDM, as BDI dhe as VMRO-DPMNE nuk kanë plan B. Tjetra është politika ditore në të cilën ne thjesht ndjekim teatrin tonë. Zgjedhjet nuk janë zgjidhja e kësaj krize, edhe nëse do të ketë zgjedhje, çfarë, prapë humbasim për një vit apo dy të tërë, edhe nëse VMRO-DPMNE i fiton zgjedhjet, do të jenë të parëndësishme, po hyjmë në politikë serioze problemet. Të gjithë e dinë këtë dhe do të kërkojnë zgjidhje në fillim të vjeshtës, prandaj duhet të shkoni me pushime tani”, ka deklaruar për KOHA, Dame Çkatroski, analist. /Kohamk/
