Gazetari i Al Jazeera-s, Anas al-Sharif, është vrarë së bashku me katër kolegë të tij nga një sulm izraelit në një tendë që po strehonte gazetarë në Gazë, raporton Aljazeera, përcjell Nistori.
Shtatë persona u vranë të cilët ishin të vendosur në tendën jashtë portës kryesore të spitalit al-Shifa të Gazës të dielën në mbrëmje, përfshirë korrespondentin e Al Jazeera-s, Mohammed Qreiqeh, dhe operatorët e kamerave, Ibrahim Zaher, Mohammed Noufal dhe Moamen Aliwa.
Pak para se të vritej, Al-Sharif, korrespondenti 28-vjeçar i njohur i Al Jazeera-s në gjuhën arabe, i cili thuhet se kishte qenë në Gazën veriore, ai shkroi në X se Izraeli kishte nisur bombardime intensive dhe të përqendruara – të njohura edhe si “rripa zjarri” – në pjesët lindore dhe jugore të Gazës.
Në videon e tij të fundit, zhurmat e forta të bombardimeve intensive me raketa të Izraelit mund të dëgjohen në sfond, ndërsa qielli i errët ndriçohet me një shkëndijë drite portokalli.
Në një deklaratë që njoftonte vrasjen e al-Sharif, ushtria izraelite akuzoi gazetarin se drejtonte një qelizë të Hamasit dhe “po avanconte sulmet me raketa kundër civilëve izraelitë dhe trupave [izraelite]”. Gjithashtu pretendoi se kishte dokumente që ofronin “prova të qarta” të përfshirjes së tij me grupin palestinez.
Muhammed Shehada, një analist në Euro-Med Human Rights Monitor, tha se nuk kishte “asnjë provë” që al-Sharif mori pjesë në ndonjë armiqësi. “E gjithë rutina e tij e përditshme ishte të qëndronte para një kamere nga mëngjesi në mbrëmje”, i tha ai Al Jazeera-s.
Rrjeti Medial Al Jazeera kishte denoncuar së fundmi ushtrinë izraelite për atë që e quajti një “fushatë nxitjeje” kundër gazetarëve të saj në Rripin e Gazës, përfshirë, më së shumti, al-Sharif. /Nistori/
