Afërsisht 80 për qind e qytetarëve janë për anëtarësimin e Maqedonisë së Veriut në Bashkimin Evropian, tha kryeministri Dimitar Kovaçevski në Samitin në Bled më 28 gusht. Me gjithë mbështetjen e lartë të qytetarëve për të cilën foli kryeministri, vetëm dy ditë më vonë, më 30 gusht, Kovaçevski dhe ministrat e qeverisë nisën ofensivën njëmujore me fushatën që kushton 80 mijë euro “Ne jemi Evropë” për të informuar dhe të bindë qytetarët për përfitimet dhe mundësitë nga anëtarësimi në BE, përmes promovimit të vlerave evropiane. Dhe atë në kushtet kur qeveria nuk e ka shumicën e nevojshme dy të tretash në Parlament për miratimin e ndryshimeve e kushtetuese, pa mbështetjen e deputetëve të VMRO-DPMNE-së.
Për drejtoreshën e Institutit për Studime të Komunikimit, Zhaneta Trajkovska, fushata “Ne jemi Evropë” është shumë e ngjashme me fushatat parazgjedhore të partive politike kur ato në përgjithësi flasin me njerëz me mendësi të njëjtë. Sipas Trajkovskës, në vend të fushatave, për momentin, pushteti dhe opozita duhet të debatojnë me njëra-tjetrën dhe të negociojnë për sigurimin e mundshëm të shumicës prej dy të tretash në Parlament për votimin e ndryshimeve kushtetuese. Gjithçka tjetër, sipas saj, mbetet si zhurmë në hapësirë dhe thjesht shpenzim i kotë i parave.
“Nuk e shoh dot qëllimin dhe kuptimin e kësaj mënyre konservatore të fushatës, sepse kryeministri dhe e gjithë qeveria shkojnë nëpër qytete dhe flasin përpara njerëzve me mendje apo njerëzve që i mbështesin nga njëra anë. Indirekt mund të ndikojë përmes mesazheve të caktuara që janë thënë nga përfaqësuesit e qeverisë, të cilat më pas do të dalin në media dhe lajme qendrore. Por me këtë do të arrihet një efekt shumë i vogël”, thotë Trajkovska. Ajo beson se kjo lloj fushate është e padobishme kur bëhet fjalë për ndikimin dhe impaktin tek ata që mendojnë se Maqedonia nuk duhet të anëtarësohet në BE. “Ose më konkretisht, kjo fushatë duhet t’i drejtohet opozitës, por nuk mund të jetë me instrumente dhe mjete të tilla”, thotë Trajkovska.
Për analistin politik, Sinisha Pekevski efekti i kësaj fushate është e njëjtë me efektin e Qeverisë, zero. Sipas tij kjo është fushatë partiake e paguar me paratë e qytetarëve. “Efekti i fushatës ‘Ne jemi Evropë’ është i barabartë me efektin e qeverisë LSD dhe BDI, zero. Fushatë partiake me paratë e shtetit. Pas ndryshimeve në ligjin e procedurës penale, të cilat u miratuan me flamur evropian dhe gënjyen se ishte për qëllim të harmonizimit me legjislacionin e BE-së, doli se ne si shtet nuk do të hyjmë kurrë në BE dhe me të drejtë vendet janë duke na vënë veton”, ka deklaruar Sinisha Pekevski, analist. “Ky është një shans historik për ekonominë tonë dhe ne nuk duhet ta humbim atë. Nuk ka alternativë tjetër, e cila në afat të shkurtër dhe afatgjatë do të mundësojë një rritje të tillë ekonomike si vendet e BE-së. Nuk ka alternativë dhe koncept tjetër për të siguruar një standard më të lartë jetese. Tani është koha e duhur për të vazhduar negociatat me BE-në. Të gjithë duhet të kemi përgjegjësi që të bëjmë gjithçka që vendi të ecë përpara”, tha Kovaçevski.
Kovaçevski në fjalën e tij nuk lëshoi të përmend siç i quajti “rezultatet historike” të Qeverisë që ai drejton. Paga minimale dhe pensionet më të larta në nivelin më të lartë historik, niveli më i lartë i punësimit, shkalla më e ulët e papunësisë në historinë e shtetit. Ai krahasoi edhe politikat integruese dhe hapjen e Qeverisë së LSDM-së me atë të Nikolla Gruevskit dhe VMRO-DPMNE-së. “Nuk po flas për pika politike. Me patriotizëm historik, me të folur për të kaluarën ku askush nuk premton asgjë, qytetarët nuk do të arrijnë askund. E pamë që 11 vjet shteti po shkonte prapa, demokracia mbrapa, nuk kishte liri të mediave. Këta qytetarë nuk e duan këtë, ata vetë kanë luftuar që ne të mos e shohim”, tha Kovaçevski.
Fushata “Ne jemi Evropë” do të zbatohet në tetë qytete të vendit. Kjo fushatë është e fundit në praktikën e kamotshme të fushatave që kryhen për promovimin e vlerave evropiane në vend. Dhe kjo pavarësisht nëse zbatuesi i tyre është shteti – përmes Qeverisë apo Sekretariatit për Çështje Evropiane apo vetë Bashkimit Evropian. Në qershor 2019, Sekretariati për Çështjet Evropiane nisi një fushatë të titulluar “Së bashku deri te yjet”. Fushata filloi në kohën kur Republika e Maqedonisë së Veriut priste hapin kyç për përparimin evropian – fillimin e negociatave. Vetëm pak muaj më vonë, në tetor 2019, Qeveria në një seancë vendosi të ndajë 325 mijë euro për ndërgjegjësimin e publikut dhe promovimin e vlerave evropiane dhe përfitimeve që shteti do të përjetojë nga anëtarësimi në BE gjatë negociatave. Por pasi data për fillimin e negociatave “dështoi”, fushata u anulua.
Një vit më parë, në vitin 2018, BE-ja zbatoi fushatën “Imagjino të ardhmen së bashku” me qëllim që qytetarëve të Maqedonisë t’u shpjegojë përfitimet e anëtarësimit të vendit dhe në prag të referendumit për ndryshimin e emrit të vendit. Në vitin 2014, autobusi i BE-së vizitoi 10 fshatra në të gjithë vendin si pjesë e fushatës informative “BE nga afër”. Qëllimi i kësaj fushate informative, të organizuar nga Delegacioni i BE-së në Shkup, ishte të vendosë komunikim të drejtpërdrejtë me popullatën nga zonat rurale dhe të ofrojë informacione lidhur me Unionin dhe shtetet anëtare.
Në periudhën nga viti 2007 deri në vitin 2010, nga Sekretariati për Çështje Evropiane dhe MASH është realizuar fushata “Mësojmë për Bashkimin Evropian”. Në të gjithë territorin e vendit u vizituan gjithsej 144 shkolla fillore, 47 shkolla të mesme dhe 15 fakultete në 7 faza. Qëllimi ishte të rritet niveli i ndërgjegjësimit të studentëve për Bashkimin Evropian, të rritet ndërgjegjësimi i tyre për rëndësinë e proceseve integruese evropiane. Pikërisht 20 vjet më parë, në vitin 2003, kur zëvendëskryeministre për integrime evropiane ishte Radmila Shekerinska, u zbatua fushata “Dhe dielli është yll”. Mesazhi politik që duhej dërguar është se dielli, si simbol i shtetit, i përket familjes evropiane, e cila identifikohet me yjet e flamurit blu të BE-së. /koha/
