Samiti i madh i NATO-s në Uashington do të mbahet nga 9 deri më 11 korrik, ndërsa delegacioni shtetëror i Maqedonisë së Veriut do të jetë i prirë nga kryeministri Hristijan Mickoski dhe kryeparlamentari, Afrim Gashi.
Në këtë samit ku do të shënohet 75 vjetori i formimit të Aleancës Veriatlantike, do të jenë pjesëmarrës 32 vende aleate dhe disa mysafirëve të rëndësishëm në kryeqytetin amerikan.
Pjesë e delegacionit qeveritar do të jenë edhe ministri i jashtëm, Timço Mucunski, ministri i mbrojtjes, Vllado Misajllovski dhe ai i brendshëm, Pançe Toshkovski.
Bashkimi Demokratik për Integrim përmes një kumtese shpreh shqetësimin se koalicioni humbës i zgjedhjeve VLEN, si protagonist të poshtërsimit të shqiptarëve, po shpërbën gjithçka të arritur për dy dekada me radhë.
“Me BDI-në në Qeveri, Republikën e Maqedonisë së Veriut jo vetëm në samitet ndërkombëtare të NATO-s dhe të tjera, por edhe në institucionet më të larta të SHBA-ve e përfaqësonin kryeministri shqiptar, zëvendëskryeministri i parë e ministrat shqiptarë. Ndërsa sot, për herë të parë vendin tonë e përfaqëson një delegacion monoetnik në Samitin e NATO-s në Washington, SHBA”, shprehen nga BDI.
Ata shtojnë se delegacioni monoetnik nga Qeveria monoetnike është një dëshmi shtesë se vazalët e VLEN-it i shumëzon me zero si pasojë e mungesës së legjitimitetit zgjedhor dhe etnik.
“Sot, në delegacionin e RMV-së në Samitin e NATO-s nuk ka vend as për zëvendëskryeministrin “xhentëllmen” e lëre më ndonjë ministër. Prezenca simbolike e deputetëve në Asamblenë Parlamentare të NATO-s dhe jo në punimet e samitit, nuk e mbulon turpin e shkeljes me dy këmbë të rolit dhe dinjitetit të shqiptarëve si popull shtetformues në vend. Aq të parëndësishëm për çështje aq të rëndësishme të bën vetëm hyrja në Qeveri pa legjitimitet”, shprehen nga BDI.
Në fund ata thonë se shqiptarët nuk e meritojnë këtë poshtërsim dhe nënshtrim në të gjitha segmeNTET E QEVERISJES.
“Ky akt përfaqëson një përpjekje sistematike për të larguar shqiptarët edhe nga pjesëmarrja në përfaqësimin e vendit në proceset integruese, në të cilat BDI ka qenë protagoniste, edhe në anëtarësimin në NATO, edhe në nisjen e negociatave për anëtarësim në Bashkimin Europian”, thuhet në fund.
