Shtrat i improvizuar me thikë, kërcënime verbale, djegie automjetesh. Këto janë disa nga incidentet e regjistruara nga Ministria e Punëve të Brendshme, ku janë vënë në shënjestër disa nga pjesëmarrësit në procese gjyqësore të profilit të lartë. Një gjyqtare dhe një prokurore shëtisin me sigurime prej vitesh, ndërsa drejtorit të burgut i është djegur makina.
Kryetarja e Gjykatës Kushtetuese, Dobrila Kacarska, po përballet me dy incidente të rënda dhe vetëm dy javë nga përfundimi i mandatit të saj.
E para ndodhi më 15 maj 2024, kur një shtrat i improvizuar dhe një thikë therëse u gjetën në një garazh nëntokësor pranë vendit të parkimit të saj. E dyta ka ndodhur fundjavën e kaluar kur ajo ka marrë kërcënime nga një i panjohur teksa ishte ulur në një kafene, i cili sipas raportit në MPB i ka thënë: “Do të përgjigjesh, do të përgjigjesh tmerrësisht!”.
Pas incidentit, në një prononcim për Radion Evropa e Lirë, Kacarska thotë se kjo nuk është hera e parë që merr kërcënime, por ndaj saj ka ndodhur edhe një sulm fizik teksa ka qenë me pushime në Greqi.
“Unë nuk do t’i bëj publike dyshimet e mia, qofshin individë, kalimtarë apo dikush qëndron pas tyre, nuk do të komentoja, por do të thoja që nuk është hera e parë. Që në momentin që kam filluar të gjykoj lëndët e PSP-së, pastaj 27 prillin, në zyrën time kanë ndodhur disa ngjarje të pakëndshme, jam sulmuar fizikisht gjatë pushimeve në Greqi, por në periudhën e fundit ato janë bërë më të shpeshta”, ka thënë Kacarska për Radion Evropa e Lirë.
Ajo prej rreth gjashtë vitesh ka marrë sigurim nga Ministria e Punëve të Brendshme pasi ka vlerësuar se ka rrezik për sigurinë e saj, veçanërisht si gjyqtare në rastin e Prokurorisë Speciale Publike të njohur si “Tanku”, në të cilin i pari i pandehuri është dënuar në mungesë, ish-kryeministri Nikolla Gruevski. Ajo nuk dëshiron të lidhë asnjë nga rastet që ka provuar me ata që e kërcënojnë, por thotë se i qëndron çdo fjale në çdo gjykim që bën.
“Nuk ndihem e sigurt, por askush nuk më lëkund të vazhdoj punën si dikur, nuk kam frikë nga askush dhe asgjë, sepse pas meje kam një karrierë të patëmetë prej 37 vitesh si gjyqtare në Gjykatën Penale dhe në Kushtetuese, të cilën e ndërtova me nder dhe profesionalizëm. Askush nuk mund të më trembë apo të ndikojë tek unë”, thotë Kacarska.
Gjyqtarja Dobrilla Kacarska ka qenë gjyqtare në Gjykatën Penale të Shkupit në disa lëndë të Prokurorisë Speciale Publike si “Tanku”, “Trista”, “Transporti” në të cilat ka shqiptuar dënime me burg për të akuzuarit zyrtarë të lartë të VMRO-DPMNE-së. Ajo ka dhënë edhe aktgjykimin për incidentet e ndodhura në Kuvend më 27 prill 2017 ndaj 16 të pandehurve, të cilët janë dënuar gjithsej me 211 vite burg.
Ndryshe, deri në fund të mandatit si kryetare e Gjykatës Kushtetuese, Kacarska ka edhe dhjetë ditë.
Villma Ruskovska e cila është në pension ka ende siguri
Kryetarja e pensionuar e Prokurorisë për Ndjekjen e Krimit të Organizuar dhe Korrupsionit, Vilma Ruskovska, ende shëtit me një roje sigurie që “ia ruan shpinën”.
MPB-ja ia dha kur Ruskovska u emërua në krye të Prokurorisë për Ndjekjen e Krimit të Organizuar dhe Korrupsionit. Policia vlerësoi se ajo kishte nevojë për mbrojtje që në atë moment. Në një bisedë telefonike për Radion Evropa e Lirë, Ruskovska thotë se së fundmi ka pasur disa, siç thotë, ofendime “të vogla” nga persona të panjohur, por nuk i kushton rëndësi.
“Kam pasur një kërcënim verbal, ka qenë në një dyqan. Në kuptimin, do të shihni se çfarë do të ndodhë me ju, ju gjykoni tonat, por unë vetëm qesha dhe u përgjigja se nuk ka të tanët dhe të tutë. Por këtë nuk e kam raportuar, kush të dojë le të flasë, prapë është liri e fjalës. Sigurisht, nëse do të gjendesha në një situatë rreziku apo sulmi fizik, do ta raportoja. Ka institucione dhe janë ato që duhet të bëjnë vlerësim”, thotë Ruskovska.
Nga ana tjetër, komentet e papëlqyeshme dhe ofenduese vërehen gjithnjë e më shpesh në rrjetet sociale, shpeshherë duket si një gjueti e organizuar ndaj saj. Ajo thotë se nuk ka profil në këto rrjete dhe nuk ndjek çfarë po ndodh.
“Ndonjëherë miqtë më njoftojnë se çfarë po shkruhet, por nuk më shqetëson”, shton shkurt Ruskovska.
Ajo beson se profesioni i tyre është i rrezikshëm, por nëse nuk e pranoni atë rrezik, më mirë të mos e bëni, thotë Ruskovska.
Ajo u ekspozua publikisht si prokurore në procesin për ngjarjet e 27 prillit. Ajo e udhëhoqi rastin edhe kundër ish-kryetares së Prokurorisë Speciale Publike (PSP) Katica Janeva për keqpërdorim të detyrës zyrtare dhe pronarit të atëhershëm të 1TV, Bojan Jovanovski (Boki 13).
Në dy raste gjatë kohës sa ishte në krye të prokurorisë, ajo ka marrë letra me kërcënime, por autori ka përfunduar në paraburgim për shkak të kërcënimeve të zv.ndihmës sekretarit të shtetit të Shteteve të Bashkuara, Gabriel Escobar.
Këshilli i Prokurorëve Publikë e ka shkarkuar pas një procedure të hapur disiplinore nga Prokuroria Publike për shkak të bastisjes në ambientet e Drejtorisë së Policisë Financiare në verën e vitit 2022, ndërsa drejtor i këtij institucioni ishte Arafat Muaremi.
Drejtori i Idrizovës e sheh prapavijën e djegies së automjetit në reformat në burg
Në të njëjtën ditë kur Kacarska ka raportuar se në garazhin e saj janë lënë sende të dyshimta, MPB ka raportuar edhe për djegien e veturës së drejtorit të burgut të Idrizovës, Zoran Jovanovski.
Në një bisedë për Radion Evropa e Lirë, ai thotë se nuk ka qenë rastësi që ngjarja ka ndodhur në ditëlindjen e tij dhe se ka një mesazh për të.
“Kam shtrënguar disa gjëra në kuadër të funksionimit të Idrizovës, sidomos rreth zgjedhjeve dhe nuk kam lejuar disa keqpërdorime. Janë disa situata të papërcaktuara që tani duhet të zgjidhen dhe tashmë janë objekt diskutimi, veçanërisht lidhur me rregulloret e miratuara nga menaxhmentet e mëparshme. Për shembull, largimi nga institucioni trajtohet si kundërvajtje, që është arratisje klasike dhe të ngjashme. Një grup më i vogël i të burgosurve është i prekur nga kjo, por e lë MPB-në të ndriçojë rastin”, thotë Jovanovski.
Ndryshe, në burgun e Idrizovës është shpallur gjendje krize deri në gusht, për shkak të mungesës së shërbimit të mjaftueshëm të rojes.
Disa nga rojet e sigurisë janë larguar nga puna pikërisht për shkak të presioneve dhe kërcënimeve, por edhe në disa raste për shkak të djegies së automjeteve të tyre.
Ai ishte jurist dhe anëtar i këshillit gjykues në gjykimin për të dënuarit për “27 Prilli” dhe incidenti ndodhi në të njëjtën natë me atë me gjyqtaren Katsarska, por Jovanovski nuk i lidh këto dy ngjarje. Ai dyshon për një motiv tjetër – reformat që po bën në burg.
MPB ende nuk i ka gjetur autorët
Nga MPB thonë se janë duke punuar për të gjitha rastet e raportuara, por nuk japin detaje. Identifikuan njeriun që kërcënoi Kacarskën – është 57-vjeçar nga Bogdanci, por edhe pse kanë bërë të ditur ende nuk kanë bërë kallëzim penal.
Për sendet e lëna si mesazh, autori ende nuk është zbuluar. MPB nuk ka identifikuar as se kush i vuri zjarrin automjetit të drejtorit të burgut. Nga prokuroria thonë se janë në pritje të raporteve nga MPB-ja që të veprojnë.
