Qeveria e VMRO-DPMNE-së vazhdon të tregojë karakterin e saj të vërtetë – shpërdorues, lakmitar dhe krejtësisht jashtë realitetit, thuhet në komunikatën e LSDM-së, përcjell Nistori.
“Përderisa mijëra familje në Maqedoni mezi ia dalin mbanë, ndërkohë që rrogat nuk mjaftojnë as për ushqimet elementare, zyrtarët e qeverisë së Hristijan Mickoskit po ushqehen me ushqime luksoze që qytetari i zakonshëm as që mund ta ëndërrojë. Papaja, mangoja dhe shparguj nuk mjaftonin qartë. Tavolinat e tyre tani përfshijnë salmon, karkaleca, oktapod, gaforre, biftek… Miliona dollarë para publike shpenzohen për ushqime ekskluzive, ndërsa punëtorët luftojnë për të mbijetuar me paga të mjerueshme”, thonë nga LSDM,
“Ky është kulmi i hipokrizisë dhe paturpësisë. Kjo qeveri kërcënoi se nuk kishte para për rritje rrogash, por me sa duket kishte para për festat e qeverisë. Të njëjtët njerëz që disa muaj më parë pretendonin se “nuk kishin shijuar kurrë rrushin, sot përdorin paratë e shtetit për të porositur ushqime luksoze vetëm për më të pasurit. Kjo qeveri nuk është një qeveri e qytetarëve – kjo është një qeveri që jeton në kurrizin e njerëzve. Ky vend nuk është një restorant privat për Mickoskin dhe elitën e tij. Zyrtarët e qeverisë janë ngopur, por njerëzit janë të uritur – dhe jo vetëm për ushqim, por për drejtësi!”, thuhet në komunikatën e LSDM-së.
Në anën tjetër, VMRO-DPMNE mohon se kanë porositur salmon dhe karkaleca, por se bëhet fjalë për marrëveshje kornizë për prokurimin e ushqimit, e cila përdoret vetëm nëse ka nevojë për delegacione zyrtare, e jo që ushqim i tillë të jetë prokuruar realisht.
Ata akuzuan qeverinë e mëparshme të LSDM-së, konkretisht ish-kryeministrin Zoran Zaev dhe ish-ministrin e Shëndetësisë, Venko Filipçe, i cili tani është lider i opozitës, për korrupsion. Ata pretendojnë se Filipçe ka ngrënë ushqim luksoz me “para të vjedhura” dhe se Zaev ka investuar në ndërtesa në Dubai.
