Sipas hulumtimit, 56.1% e qytetarëve konsiderojnë se Kushtetuta nuk duhet të ndryshohet dhe në të të përfshihen bullgarët dhe kombet e tjera për të vazhduar negociatat me BE-në. Vetëm 27.5% e të anketuarve mbështesin ndryshimet kushtetuese. Shumica e atyre që mbështesin ndryshimet kushtetuese janë shqiptarë etnikë. Rreth 79.3% e shqiptarëve etnikë mbështesin përfshirjen e bullgarëve në Kushtetutë, ndërsa 72.4% e maqedonasve janë kundër. Vetëm një në dhjetë maqedonas, ose 11.2% e të anketuarve, mbështesin amendamentet kushtetuese me qëllim përfshirjen e bullgarëve në Kushtetutë. Qëndrimet krejtësisht të ndryshme të maqedonasve dhe shqiptarëve etnikë plotësohen me faktin se vetëm 8.8% e shqiptarëve etnikë janë kundër ndryshimeve kushtetuese.
Tre të katërtat e qytetarëve thonë se janë mjaft të informuar se çfarë konsiston në ndryshimet kushtetuese dhe shumica e tyre frikësohen se do të kenë pasoja negative për vendin. Sondazhi tregon se 75.4% e të anketuarve thanë se e dinë se çfarë konsistojnë ndryshimet kushtetuese, krahasuar me vetëm 17.3% që thanë se nuk kishin informacion. 60.8% e të anketuarve janë të mendimit se ndryshimet kushtetuese do të kenë pasoja negative për vendin, ndërsa 19.1% nuk presin pasoja negative. Dhe për këtë çështje ka qëndrime mjaft të kundërta mes maqedonasve dhe shqiptarëve etnikë. Derisa 71% e maqedonasve besojnë se ndryshimet kushtetuese do të kenë pasoja negative për vendin, këtë mendim e ndajnë vetëm 31% e shqiptarëve, të cilët në një shumicë prej 42% besojnë se nuk do të ketë pasoja negative. Këtë qëndrim e ndajnë vetëm 11.2% e maqedonasve.
Shumica e qytetarëve nuk presin asgjë pozitive nga ndryshimet kushtetuese. 54.5% thonë se ndryshimet kushtetuese nuk do të kenë pasoja pozitive për vendin, ndërsa 28.3% besojnë se do të kenë. Dhe këtu shumica e shqiptarë etnikë, apo 73.2%, besojnë se ndryshimet kushtetuese do të kenë ndikim pozitiv në Maqedoninë e Veriut, madje 66.6% e maqedonasve kanë mendim të kundërt.
Shumica e qytetarëve presin që VMRO-DPMNE opozitare të qëndrojë konsekuente dhe të mos i mbështesë ndryshimet kushtetuese. Këtë qëndrim e kanë 42% e të anketuarve, ndërsa një e katërta ose 25% presin që partia më e madhe opozitare të ndryshojë qëndrim. Duke parë grupet etnike, 45.7% e maqedonasve besojnë se VMRO-DPMNE do të mbetet konsistente, krahasuar me 43.3% të shqiptarëve etnikë që presin që VMRO-DPMNE të heqë dorë. Vetëm një në pesë maqedonas ose 19.2% besojnë se opozita do të votojë për amendamentet kushtetuese, ndërsa çdo i treti shqiptar ose 33% e të anketuarve besojnë se VMRO-DPMNE nuk do të votojë për amendamentet kushtetuese.
Shumica e qytetarëve nuk pajtohen me ndryshimet kushtetuese edhe në një situatë nëse Maqedonia e Veriut do të merrte garanci shtesë. 45.3% e të anketuarve thonë se nuk do të pranonin ndryshimin e kushtetutës dhe do të vazhdonin negociatat me BE-në me garanci shtesë që do të merrte Maqedonia e Veriut. Përkrahje për ndryshime kushtetuese në një situatë të tillë japin 35.7% e të anketuarve.
57.9% e maqedonasve etnikë janë kundër ndryshimit të Kushtetutës edhe në një situatë kur do të merrnin garanci shtesë, ndërsa 21.9% thonë se në një rast të tillë do të mbështesin ndryshimet kushtetuese. Në mesin e shqiptarëve, 78.5% mbështesin ndryshimet kushtetuese, ndërsa vetëm 7.7% janë kundër. Analiza e strukturës së moshës të përgjigjeve tregon se kundërshtarët më të mëdhenj të ndryshimit të kushtetutës janë qytetarët e moshuar, ndërsa më pak kundërshtime janë tek të rinjtë. Anketa e Institutit për Hulumtime Politike në Shkup është realizuar përmes telefonit në periudhën prej 2 deri më 6 maj të këtij viti në mostër përfaqësuese prej 1112 të anketuarve. /Koha/
