Njeriu i parë i Strugës, Ramiz Merko, nuk është paraqitur mbrëmë në hapjen e 62 mbrëmjeve strugane të poezisë, ku ishin të pranishëm ministra dhe diplomatë. Në vend të Merkos, i cili tashmë tre muaj është në listën e zezë të SHBA-së, erdhi kryetarja e Këshillit. Struganët më të vjetër thonë se mezi e njohin festivalin.
“Ishte festë për të gjithë qytetin. Dihet që njerëzit përreth dilnin të rregulluar dhe prisnin çfarë do të ndodhë. Sot ka ikur ajo dashuria e madhe për festivalin, ai interesim i madh. Mendoj se politika është pengesë për këtë. Financimi është gjithashtu katastrofik, nuk është ai që ka qenë. Dikur vinin shumë poetë, tani vijnë gjithnjë e më pak”, u shpreh Romeo Sanxhakoski – qytetar.
“Dëshiroj të kthehet shkëlqimi i mbrëmjeve strugane, siç ishte 20, 30 vjet më parë, ku Struga festonte dhe jetonte ato katër-pesë ditë me festivalin. Mendoj se numri i pjesëmarrësve është ulur mjaft”, tha Rade Miladin – qytetar.
Drejtori i festivalit thotë se komuna duhet të japë kontribut më të madh për festivalin.
“Për të rikthyer masën në këtë kohë të re, për mendimin tim, autoritetet vendore duhet të përfshihen më shumë në animacion dhe organizim dhe duhet të përfshihen më shumë përmbajtje multimediale në ato ngjarje kryesore të hapjes dhe mbylljes ceremoniale për të tërhequr vëmendjen e publikut”, deklaroi Todorçe Taseski – drejtor i MSP.
Ndryshe, gjuha shqipe përdoret prej vitesh tashmë në mbrëmjet strugane, gjë që nuk ndodhte më parë. Poezia përkthehet edhe në shqip. Fituesi i sivjetshëm i Kurorës së Artë është poeti Vllada Urosheviq. /Alsat/
