Mbretëria e Bashkuar do të detyrohet të bjerë dakord këtë muaj për të rritur shpenzimet e mbrojtjes në 3.5% të të ardhurave kombëtare brenda një dekade, si pjesë e një përpjekjeje të NATO-s për t’u riarmatosur dhe për të mbajtur ShBA-në “në anën e saj”.
Kështu shkruan mediumi britanik, Sky News, i cili kujton se Sir Keir Starmer do të zhvillojë një diskutim për të vendosur mbi objektivin e shpenzimeve të mbrojtjes.
Dhe përveç një rritjeje prej 3.5% të shpenzimeve të mbrojtjes deri në vitin 2035, ai ka të ngjarë të detyrohet gjithashtu të angazhojë 1.5% të PBB-së për fusha të lidhura me mbrojtjen, siç janë agjencitë e spiunazhit dhe infrastruktura.
Siç vë në pah Sky News, ushtritë kanë nevojë për rrugë, rrjete hekurudhore dhe aeroporte për t’u vendosur me shpejtësi.
Kjo do të rriste shpenzimet totale të mbrojtjes në 5% – një objektiv që Mark Rutte, kreu i NATO-s, dëshiron që të gjithë aleatët ta nënshkruajnë në një samit të madh në Holandë më vonë këtë muaj.
Kjo po quhet “Plani i investimeve të Hagës”.
Ndërsa i pyetur se çfarë do të ndodhte në samit, një burim i mbrojtjes tha: “3.5% pa dyshim”.
Megjithatë, kryeministri përsëriti ambiciet prej 3% kur publikoi një rishikim të madh të mbrojtjes të hënën që e vendosi “NATO-n të parën” në zemër të politikës së mbrojtjes së Mbretërisë së Bashkuar.
Por burimi i mbrojtjes tha: “Si mund të keni një rishikim të mbrojtjes që thotë NATO e para dhe pastaj të jeni ndër të fundit nga 32 shtetet anëtare të aleancës – së bashku me vende si Spanja – që mbështesin këtë qëllim të ri?”. /
