Debati i mbrëmshëm mes presidentit aktual Joe Biden dhe kundërkandidatit të tij Donald Trump, i cili garon sërish për të parin e Shtëpisë së Bardhë është përcjell nga miliona amerikanë.
Në të janë diskutuar çështje të ndryshme nga lufta në Ukrainë, Rripin e Gazës, largimi i trupave amerikane nga Afganistani e deri të aborti e COVID-19, transmeton Telegrafi.
Gjatë këtij debati të organizuar nga CNN, ka patur shpesh përplasje verbale mes dy pjesëmarrësve që akuzonin rëndë njëri-tjetrin për çështje të ndryshme.
Madje Trump pretendonte se nëse do të ishte president i Shteteve të Bashkuara, lufta në Ukrainë as që do të fillonte.
Nga ana tjetër, Biden në disa momente ishte i paqartë në përgjigjet e tij – duke bërë “pauza” disa sekondëshe, duke nxitur sërish polemika nëse mosha është problem për të që të marrë edhe një mandat.
Disa prej momenteve kyçe të këtij debati janë përmbledhur nga mediat amerikane, të cilat janë konsideruar si ndër më interesantet për opinionin.
Formati, ku secili merrte me radhë fjalën për të folur e kundërshtari kishte të mbyllur mikrofonin, ide e krijuar për të parandaluar ‘një përplasje’ me të dy kandidatët që flisnin dhe ndërprisnin njëri-tjetrin.
Në të vërtetë, shërbeu për të nxjerrë në pah dallimet në performancat e dy burrave.
Trump dukej i sigurt, në këmbë dhe në komandë, edhe nëse pretendimet e tij ndonjëherë e shtrinin të vërtetën deri në pikën e thyerjes.
Nga ana tjetër, Biden ishte në mëdyshje, ndonjëherë duke u penguar nga fjalët e tij dhe në një moment dukej se ngrinte, më pak se 10 minuta në debat.
E vetmja herë kur Biden u duk se pati ndonjë goditje ishte kur ai humbi durimin dhe sulmoi Trumpin dhe “moralin e tij të maceve”.
Pas debatit, figurat politike dhe komentuesit hodhën idenë e zëvendësimit të Biden si kandidati demokrat.
Është “koha për të folur për një konventë të hapur dhe një kandidat të ri demokratik”, tha një ligjvënës demokrat për rrjetin partner amerikan të Sky NBC News.
Një tjetër tha: “Ishte si një boksier kampion që kalon në ring për të kaluar kulmin e tij dhe i duhet këndi i tij për ta hedhur poshtë”.
Ligjvënësi shtoi gjithashtu se ai do të thoshte se Biden duhet të largohej nga gara.
David Axelrod, një ndihmës i lartë i ish-presidentit Barack Obama, i tha CNN: “Ka një ndjenjë shoku se si ai doli në fillim të këtij debati. Si dukej zëri i tij. Ai dukej pak i çorientuar”.
“Do të ketë diskutime nëse ai duhet të vazhdojë. Vetëm ai mund të vendosë nëse do të vazhdojë”, shtoi Axelrod.
Korrespondentja amerikane e Sky, Martha Kelner tha se disa demokratë e kishin përshkruar performancën e debatit të Biden si një “katastrofë të pazbutur”, “një shkrirje” dhe “një përplasje me makinë me lëvizje të ngadaltë”.
Joe Biden dhe rivali i tij republikan Donald Trump kritikuan ashpër njëri-tjetrin mbi çështjen e ekonomisë, abortin, imigracionin dhe politikën e jashtme gjatë mandateve të tyre në debatin e tyre të enjten, duke u dhënë votuesve një mundësi për të parë krah për krah kandidatët më të moshuar presidencialë në historinë e Shteteve të Bashkuara.
Presidenti Biden fliste me zë të ngjirur dhe ngatërroi fjalët në disa raste gjatë debatit, ndërsa zoti Trump e goditi atë me kritika të njëpasnjëshme, që përfshinin disa gjëra të pavërteta që i ka thënë shpesh, duke përfshirë pretendimet se emigrantët kanë sjellë një valë krimi dhe se demokratët mbështesin vrasjen e foshnjave, shkruan Zëri i Amerikës.
Dy zyrtarë të Shtëpisë së Bardhë thanë se Presidenti Biden ishte me grip.
Joe Biden dhe Donald Trump bënë një numër gabimesh faktike në fillim të debatit të enjten në Atlanta.
Presidenti Biden e filloi debatin me një gafë, duke pretenduar se kishte krijuar 15,000 vende pune.
Numri i saktë është më shumë se 15 milionë vende të reja pune gjatë mandatit të tij, një nëvlerësim dramatik nga një kandidat, që po përpiqet të rifitojë besimin e votuesve në aftësitë e tij për të udhëhequr ekonominë e vendit.
Biden tha gjithashtu se “një dozë e insulinës kushton 15 dollarë tani, në krahasim me 400 dollarë”.
Por kostoja e insulinës për amerikanët e moshuar, të cilët janë pjesë e programit të sigurimeve shëndetësore të qeverisë, është ulur në 35 dollarë bazuar në ligjin e pakësimit të inflacionit, të cilin Presidenti Biden e nënshkroi në vitin 2022.
Kjo ulje e kostos së ilaçit të insulinës hyri në fuqi në vitin 2023, duke detyruar shumicën e kompanive të sigurimeve shëndetësore që ta ulin në 35 dollarë koston e ilaçit.
Zoti Trump tha se ekonomia amerikane ishte gati të fillonte të paguante borxhin e saj kombëtar përpara pandemisë së Covid-19.
Kjo nuk është e vërtetë, thekson VOA.
Deficiti buxhetor po rritej gjatë mandadit të zoti Trump, sepse shkurtimi i taksave në vitin 2017, një ligj që e ka mbështetur ai, nuk ka ndihmuar në uljen e deficitit ashtu siç kishte premtuar ai.
Zoti Trump trashëgoi një deficit buxhetor prej 585 miliardë dollarësh dhe ai u rrit në 984 miliardë dollarë në 2019, duke shënuar një rritje prej mbi 3 trilionë dollarësh vetëm në 2020 pas fillimit të pandemisë, sipas Zyrës së Menaxhimit të Buxhetit në Shtëpinë e Bardhë.
Presidenit Biden nga mesi i debatit filloi të përqëndrohej në sulmet ndaj zotit Trump duke përmendur gjyqin në Nju Jork, në të cilin zoti Trump u shpall fajtor për fshehjen e pagesave për aktoren e filmave pornografikë Stormy Daniel për të mbajtur të fshehur një marrëdhënie seksuale me të.
Presidenti Biden e quajti rivalin e tij republikan “një njeri të shpallur fajtor për një krim”.
Ish Presidenti Trump u përgjigj duke përmendur gjyqin ndaj djalit të Presidentit Joe Biden, Hunter Biden, në të cilin ai u shpall fajtor për akuzën se ka gënjyer në një formular për blerjen e një arme mbi historinë e përdorimit të drogës.
I pyetur për sulmin ndaj Kapitolit më 6 janar 2021 nga një turmë e mbështetësve të tij, ish-presidenti Trump u përgjigj duke thënë se ai nuk ishte përgjegjës për protestën në Kapitol dhe pretendoi se shumë nga të arrestuarit janë të pafajshëm.
“Ky është presidenti më i keq në historinë amerikane. Ky njeri nuk e kupton demokracinë amerikane”, tha Presidenti Biden në përgjigje të këtyre komenteve të rivalit të tij republikan.
Ish-presidenti Donald Trump u ankua se emigrantët që po hyjnë në vend në mënyrë të paligjshme po strehohen në “hotele luksoze” ndërsa veteranët e ushtrisë sonë janë në rrugë.
Siç pritej, ai gjithashtu u përqëndrua shumë në çështjen e krimeve të emigrantëve.
Ai tha gjithashtu se emigrantët po shkojnë në Shtetet e Bashkuara nga “institucionet mendore” dhe “azilet”.
Ai nuk ka dhënë prova për këtë pretendim, të cilin e ka bërë shpesh në tubimet elektorale.
“Ne jemi si një vend i pazhvilluar dhe kjo është e turpshme”, tha zoti Trump në debatin televiziv në selinë e kanalit CNN në Atlanta.
“Ne nuk respektohemi më”, theksoi zoti Trump, duke fajësuar për këtë Presidentin Biden. “Ata mendojnë se ne jemi budallenj”.
Gjatë debatit, zoti Biden dhe zoti Trump ishin dakord në kundërshtimin e kushteve të presidentit rus Vladimir Putin mbi përfundimin e luftës në Ukrainë.
Por, zoti Trump përsëriti pretendimet e tij se lufta nuk do të kishte filluar kurrë në radhë të parë nëse ai do të kishte qenë president.
Ai kritikoi gjithashtu Presidentin Biden për ndihmat e mëdha që Shtetet e Bashkuara i kanë dhënë Kievit.
Zoti Biden tha se zoti Trump do të tërhiqte Shtetet e Bashkuara nga NATO dhe do të rrezikonte një luftë në zgjerim.
Dhe për udhëheqësin rus, Presidenti Biden tha: “Fakti është se Putini është një kriminel lufte”.
Debati ishte një shans për të dy kandidatët që të flisnin për planet dhe vizionin e tyre për vendin dhe të bindin votuesit e pavendosur.
Në Atlanta të Xhorxhias, një shtet i pavendosur dhe i rëndësishëm për zgjedhjet presidenciale, janë të pranishëm politikanë republikanë që mund të jenë në listën e kandidatëve për nënpresident, përfshirë senatorin nga Ohajo JD Vance, ish guvernatorin e Dakotës së Veriut Daug Bergum, senatorin nga Karolina e Jugut Tim Scott dhe senatorin nga Florida Marco Rubio.
I mbajtur mbi katër muaj përpara zgjedhjeve të 5 nëntorit, debati Biden-Trump ishte një nga debatet me të hershme presidenciale në cilkin katër vjeçar të zgjedhjeve presidenciale në Shtetet e Bashkuara.
Ai ishte gjithashtu një përsëritje e dy debateve të tyre të vitit 2020, që u mbajtën dy muaj para zgjedhjeve, në të cilat zoti Biden fitoi ndaj Presidentit të arëhershëm Donald Trump.
Një debat i dytë mes Presidentit Biden dhe ish Presidentit Trump është caktuar të mbahet më 10 shtator.
