Zbatimi i planit të ri të rritjes po ecën siç duhet dhe po na afron çdo ditë e më shumë me Bashkimin Europian, u shpreh kryeministri i Shqipërisë Edi Rama, nga takimi i liderëve BE-Ballkani Perëndimor. Sipas tij, Shqipëria kurrë nuk ka qenë më afër BE-së!
“Kurrë nuk kemi qenë më afër realizimit të një aspirate shumë shekullore. Dhe nga ana tjetër më vjen mirë që ka një atmosferë të përgjithshme pozitive në këtë drejtim. Jemi shumë afër. Nuk kemi qenë asnjëherë më afër, dhe besoj shumë që ne do t’i përmbushim të gjitha detyrimet tona siç kemi paraparë afatet me Komisionin Europian dhe plani i përbashkët do të realizohet plotësisht”, deklaroi kryeministri i Shqipërisë, Edi Rama.
Kryeministri i Kosovës, Albin Kurti duke folur para mediave, theksoi rëndësinë e bashkëpunimeve që Kosova dhe Maqedonia e Veriut kanë bërë deri më tani për pikat kufitare me sistemin “One stop shop”.
“Për mua është gjithnjë kënaqësi që të vij në Shkup, sidomos tash që kemi pikat e përbashkëta të kontrollit, edhe në Hani i Elezit-Bllacë, e cila më 12 prill u funksionalizua, edhe ajo në Glloboçicë-Jazhincë, e cila më 28 maj sivjet u funskionalizua. Të gjitha këto janë rezultat i marrëveshjeve të përbashkëta që i kemi bërë me qeverinë Mickoski, me datën 18 nëntor të viti të kaluar në Prishtinë, në mbledhjen e përbashkët të dy qeverive tona”, potencoi Albin Kurti – kryeministër i Kosovës.
Në fjalën e saj hyrëse të këtij takimi, komisionerja për zgjerimin e BE-së, Marta Kos, tha se tani ka konsensus të qartë për zgjerimin, por edhe se dritarja e mundësive mund të mos jetë e hapur gjithmonë.
Ajo përmendi në veçanti rrugën e bërë nga secili shtet i Ballkanit Perëndimor për eurointegrimin.
Për Shqipërinë theksoi hapjen e tre klasterëve në gjashtë muajt e fundit, ndërsa shtoi se nëse vazhdohet kështu, ka mundësi që brenda vitit të hapen të gjithë klasterët dhe në vjeshtë të hapet i fundit.
Për Kosovën, tha se presin që Qeveria e re të japë shumë energji në procesin e anëtarësimit.
Për Serbinë tha se po shpresojnë që së shpejti të lëvizet përpara.
Për Malin e Zi përmendi mbylljen e një kapitulli tjetër muajin e kaluar, ndërsa për Bosnjë dhe Hercegovinën përmendi adoptimin e agjendës së reformave.
