Ndryshe nga qeveria e tyre, shumica e gjermanëve mbështesin njohjen e një shteti palestinez, tregoi një sondazh i publikuar sot nga “Internationale Politik” me seli në Berlin.
Rreth 54% e të anketuarve kanë thënë se janë në favor të njohjes së Palestinës si shtet i pavarur, ndërsa 31% kanë kundërshtuar idenë.
Një segment i madh i të rinjve gjermanë dhe mbështetësve të partisë opozitare radikale të majtë, Partia e Majtë, e kanë mbështetur këtë hap.
Midis mbështetësve të Partisë së Majtë, rreth 85% e të anketuarve e kanë mbështetur njohjen e Palestinës.
Midis mbështetësve të Partisë së Gjelbër të opozitës, shifra ishte 66%, dhe midis mbështetësve të Partisë Social Demokratike (SPD) që bashkëqeverisë, përqindja ishte 52.
Mbështetja ishte veçanërisht e ulët midis Unionit Kristian Demokrat/Bashkimit Kristian Social (48%) dhe Alternativës për Gjermaninë të ekstremit të djathtë (AfD) (45%).
Një sondazh i mëhershëm ka treguar që shumica e gjermanëve duan që qeveria e tyre të ushtrojë më shumë presion mbi Izraelin në lidhje me veprimet e tij në Rripin e Gazës.
Sondazhi “DeutschlandTrend”, i porositur nga transmetuesi publik ARD, zbuloi se 66% e pjesëmarrësve janë pajtuar me deklaratën se “qeveria gjermane duhet të ushtrojë më shumë presion ndaj qeverisë izraelite për ta ndryshuar qëndrimin e saj ndaj Rripit të Gazës”.
Presioni në rritje i opinionit publik ndaj qeverisë gjermane – i nxitur nga raportimet për fëmijë që po vdesin nga uria në Gaza – e shtyu kancelarin Friedrich Merz që të premten të njoftojë pezullimin e pjesshëm të eksporteve të armëve drejt Izraelit. /AA/
