Gjyqtari i procedurës paraprake caktoi masë paraburgimi prej 30 ditësh Angel Saramakovit, pjesëtar i sigurimit të kryeministrit Hristijan Mickoski, i cili u arrestua dje pasi u kap në Veles duke marrë materiale zyrtare nga MPB, përcjell Nistori.
Gjykata Penale ka konfirmuar për SP se i është caktuar masa e paraburgimit prej tridhjetë ditësh. Sipas informacioneve, Saramakovi dyshohet për veprën penale nga neni 360 paragrafi 2 i Kodit Penal dhe për këtë i është caktuar masa e paraburgimit prej tridhjetë ditësh, ndërsa nëse ndiqet sipas paragrafëve të tjerë të këtij neni, i caktohet paraburgimi afatshkurtër tetë dior.
Në fakt, Saramakov ndiqet penalisht për nxjerrje të sekretit zyrtar me qëllim favorizimi ose shfrytëzim të të dhënave jashtë vendit.
Lajmi është konfirmuar dje nga MPB-ja dhe Qeveria, por zyrtarisht askush nuk e ka konfirmuar se truproja Angel Saramakov i ka dhënë sekrete zyrtare grupit të Gërçecit.
Prokurori ka bërë disa hetime, përfshirë kontrolle në shtëpinë dhe automjetet e tij. Saramakov, sipas MPB-së, në mënyrë të paligjshme posedonte materiale nga Ministria, të cilat ua jepte personave të tretë.
Prokuroria për Ndjekjen e Krimit të Organizuar zyrtarisht nuk ka dhënë asnjë informacion për këtë rast, ndërsa MPB-ja ende nuk ka dhënë një përgjigje se si personeli i sigurisë mund të ketë akses në dokumentet për hetime dhe nëse hetimi do të shtrihet edhe për personat e tjerë që kanë ofruar qasje në dokumente.
