“Qëndrojmë plotësisht pas Maqedonisë së Veriut në rrugën e saj drejt BE-së. Mund të mbështeteni tek ne,” shkroi në rrjetin social “X” presidentja e Komisionit Evropian, Ursula von der Leyen, pas takimit në Qeveri me kryeministrin Hristijan Mickoski.
“Hapi juaj i ardhshëm dhe i vetëm para hapjes së negociatave është i qartë – të bëni ndryshimet kushtetuese. Topi është në fushën tuaj. BE-ja është e gatshme,” shkroi shkurt Von der Leyen.
Ndërsa Mickoski në takim ka theksuar se vendi pret nga Bashkimi Evropian përkushtim të qartë dhe konkret, si konfirmim i perspektivës evropiane dhe mbështetje për qytetarët, të cilët me dekada mbeten të përkushtuar ndaj vlerave evropiane.
Presidentja e KE-së, Von der Leyen, ka mbërritur sot në Shkup. Gjatë qëndrimit të saj, ajo zhvilloi takime me presidenten e Maqedonisë, Gordana Siljanovska-Davkova, dhe me kryetarin e Parlamentit, Afrim Gashi.
