Qeveria e Maqedonisë ende shpreson në një arritje të marrëveshjes me Sofjen zyrtare lidhur me ndryshimet kushtetuese që përfundimisht vendi të ecë para në rrugën drejt anëtarësimit në Bashkimin Evropian.
“Numri i diplomatëve në Evropë dhe në botë që shikojnë me simpati argumentet tona, pozicionin tonë dhe zgjidhjen e mundshme që ne propozojmë është në rritje. Ne veprojmë me fakte dhe mbrojmë interesat. Çështja është se çfarë do të ketë, për të gjetur një zgjidhje apo jo. Pse nuk duhet të respektojmë Marrëveshjen e Fqinjësisë së Mirë? Jo protokolli, jo propozimi, por Marrëveshja. Marrëveshja me Bullgarinë nuk thotë se duhet të ketë ndryshime kushtetuese. Epo, pra, ta respektojmë, ne e kërkojmë, respektojmë Marrëveshjen, a është Marrëveshje apo jo? Ta respektojmë”, kështu tha në një paraqitje televizive kryeministri Hristijan Mickoski.
Duke folur për zhbllokimin e procesit të integrimeve evropiane, Mickoski thekson edhe një herë se është optimist. Të gjitha argumentet, sipas tij, janë në anën tonë. Ai gjithashtu theksoi se mesazhi i dërguar nga Sofja zyrtare është shumë i rëndësishëm.
“Problemi është shumëpalësh apo dypalësh? Cili është mesazhi? Dëgjojmë tone dhe deklarata konfuze nga Sofja. Shpresoj që pas konsolidimit të shoqërisë pas zgjedhjeve të kemi një pasqyrë më të qartë dhe të marrim mesazhe përfundimtare. Ne themi se kur Parlamenti bullgar të ratifikojë marrëveshjen e anëtarësimit të vendit në BE, atëherë do të vlejnë ndryshimet kushtetuese. Të bëjmë një kryevepër tjetër, theksoi Mickoski, duke aluduar në Marrëveshjen e Prespës, të cilën diplomatët në të kaluarën, siç theksoi ai, e kanë paraqitur si kryevepër.
Ai ka thënë edhe një herë se derisa të drejtojë qeverinë do të mbrohen interesat kombëtare.
“Një numër i madh diplomatësh evropianë dhe botërorë i shohin me dashamirësi argumentet dhe qëndrimet tona lidhur me një zgjidhje të mundshme që ne propozojmë dhe për të cilën kemi folur gjatë periudhës së kaluar. Së fundi, ne si vend shihemi si partner dhe jo si diçka për t’u dhënë ryshfet. Mendoj se kemi rikthyer besueshmërinë dhe dinjitetin në skenën ndërkombëtare. Mund të jetë më e vështirë si një vend më i vogël të mbrosh interesat kombëtare, por për sa kohë që unë drejtoj qeverinë, interesat kombëtare do të mbrohen dhe do të mbrohen”, nënvizoi kryeministri. Mickoski tha se koha do të tregojë nëse ai ishte me të drejtë optimist. “Pres që në periudhën e ardhshme të përmbyllet kjo temë që të zhbllokojmë procesin dhe të fillojmë negociatat”, theksoi Mickoski.
Ndërkaq, partneri tjetër i koalicionit qeverisës, kryetari i Lëvizjes ZNAM, Maksim Dimitrievski thotë se personalisht është i zhgënjyer nga ndarja e Shqipërisë nga Maqedonia e Veriut në rrugën drejt BE-së dhe pret rritje të euroskepticizmit në vend, por beson se përpjekjet diplomatike duhet të vazhdojnë në drejtim të zhbllokimit të integrimeve evropiane me mbrojtje dinjitoze të interesave shtetërore.
“Unë personalisht jam i zhgënjyer. Fillimisht i uroj suksese Shqipërisë, është vendi ynë fqinj dhe i gjithë rajoni duhet të integrohet siç duhet. Unë kam një mendim se sinqerisht termi Ballkan Perëndimor më shqetëson sepse këtë ua them të gjithë diplomatëve të huaj nga vendet evropiane. Ne nuk jemi më pak evropianë se ata. Ashtu siç ata patën fatin të lindën në Evropën Perëndimore, ne lindëm në Evropën Juglindore dhe Lindore. Unë mendoj se nëse BE-ja nuk gjen instrumente, mjete, sepse ne tani po diskutojmë në nivel shumëpalësh për një problem dypalësh të vetëvendosur nga Bullgaria, në vend do të ngrihet euroskepticizmi. Dhe mendoj se fakti që ne në thelb po luftojmë për të mos lejuar ndikimin e huaj në rajon, ndërkohë që llogarisim te kinezët dhe rusët, fatkeqësisht do të rritet dhe Evropa duhet të jetë e vetëdijshme për këtë. Prandaj besoj se përpjekjet tona diplomatike duhet të vazhdojnë, por me shpinë të drejtë e jo shtyllë të përkulur, për t’i mbrojtur interesat tona kombëtare shtetërore me dinjitet ashtu si populli maqedonas, shteti maqedonas dhe interesat e të gjithë qytetarëve të Maqedonisë”, tha Dimitrievski në një paraqitje televizive.
Në koalicionin qeveritar, ai dhe kryeministri ndajnë qëndrim të ngjashëm për ndryshimet kushtetuese me efekt të vonuar, ndërsa për premtimet e VLEN-it se negociatat me BE-në mund të fillojnë pas gjashtë muajsh, kryetari i ZNAM thotë se këto janë premtime jo reale, duke theksuar se ndryshimet kushtetuese janë të mundshme vetëm me aplikim të vonuar dhe nëse sigurohen garanci nga Brukseli për identitetin dhe gjuhën. /Koha/
