Jeton Asani një elektroinxhinier dhe ndërmarrës i suksesshëm nga Tetova dhe një person me disa hobi interesante. Nistori ka intervistuar Asanin, duke marrë përgjigje për karrierën e tij profesionale, rrugëtimin deri nga profesioni deri te hobi.
Nistori: na trego diçka për historinë tuaj personale dhe zgjedhjes së karrierës, që shikuesit ta kenë pak më të qartë?
Jeton Asani: unë jam një elektroinxhinier i diplomuar dhe kam një histori interesante lidhur me zgjedhjen e profesionit tim. Pavarësisht se jam rritur nga një familje ku shumica e anëtarëve janë mjekë duke filluar nga babai, vëllau, axhallarët, nuk e kam pasur kurrë ndjenjën se duhet të ndiqja këtë rrugë. Që në moshë të re, kam shfaqur një interes të madh për kompjuterat dhe teknologjinë, gjë që më shtyu të zgjidhja Fakultetin Elektroteknik në Universitetin e Shkupit. Për mua, zgjedhja për të studiuar këtë fushë ishte një hap i parë drejt lirisë dhe pasionit tim, dhe kjo është diçka që më ka shoqëruar gjatë gjithë jetës. Ky vendim i ka dhënë jetës time një drejtim dhe ka ndikuar në mënyrën se si i shoh dhe i jetoj mundësitë. Jam shumë mirënjohës për mbështetjen që kam marrë nga prindërit e mi, të cilët gjithmonë më kanë inkurajuar dhe mbështetur në këtë udhëtim.
Nistori: na thuaj diçka rreth rrugëtimit tënd profesional?
Jeton Asani: rrugëtimi im profesional ka qenë një përvojë interesante dhe dinamike. Fillimisht, pata mundësinë të zhvilloj një karrierë akademike dhe të ushtroja këtë përvojë për një periudhë të shkurtër. Megjithatë, e kuptova se ky drejtim nuk ishte në përputhje me natyrën time dhe pas një oferte që mora, vendosa të bëj një ndryshim të rëndësishëm. Puna ime në Telekomin e Maqedonisë, i cili më vonë u shndërrua në T Home, ishte një hap i rëndësishëm në karrierën time. Gjatë njëmbëdhjetë viteve të punës si inxhinier dhe menaxher i lartë për shfrytëzuesit e mëdhenj, pata mundësinë të punoj me një ekip shumë të talentuar dhe të takoj njerëz me pasione dhe përvoja të ndryshme. Kjo periudhë më ndihmoi të zhvillohem si profesionist dhe më frymëzoi të themeloj një biznes privat në fushën e softuerëve, një fushë në të cilën punoj edhe sot, me shumë pasion dhe përkushtim. Përvoja në telekom dhe zhvillimi i biznesit të përvetësuar më lejuan të njoh dhe të bashkëpunoj me individë nga profesione dhe interesa të ndryshme, duke më pasuruar
përvojën time dhe duke zgjeruar horizontet e mia profesionale.
Nistori: cilët ishin ato aktivitete që të kanë provokuar dhe që u bënë frymëzim për ty?
Jeton Asani: aktivitetet që më kanë provokuar dhe më kanë shërbyer si frymëzim kanë pasur lidhje të ngushta me pasionet e kolegëve të mi. Ata ishin jo vetëm profesionistë të shkëlqyer në fushat e tyre, por gjithashtu sportistë të pasionuar të sporteve ekstreme, si parashutizmi, paragllajderizmi, skijimi në pistat e egra, dhe biciklizmi. Gjatë kësaj periudhe, takova për herë të parë njerëz që kishin një pasion të veçantë për anijet me vela. Unë e provova çdo sport që ata e praktikonin, por më shumë se çdo gjë tjetër, më tërhiqte lundrimi me anije me vela. Përshtypja ime e parë me një anije me vela ka qenë në tetor të vitit 2008 dhe që atëherë, ky pasion është bërë pjesë e pandashme e jetës sime. Kam qenë pjesë e garave që organizon klubi jonë “NOV Veter”, një iniciativë qytetare shumë e suksesshme që bashkon njerëz nga profesione dhe shtresa të ndryshme, por që e lidh pasioni i përbashkët për lundrimin me vela. Ky përkushtim dhe përvoja në sporte ekstreme, sidomos në lundrimin me vela, më ka ndihmuar të zhvilloj një perspektivë të re dhe më të gjerë, duke më dhënë një ndjenjë lirie dhe kontrolli të plotë.
Nistori: si do ta përshkruani një përvojë të lundrimit?
Jeton Asani: lundrimi është një përvojë që është shumë e vështirë të përshkruhet me fjalë, pasi ajo duhet patjetër të përjetohet për ta kuptuar në plotësinë e saj. Në det, fjala “liri” merr një dimension krejtësisht të ri. Kur jemi në anijet që i huazojmë për një periudhë prej shtatë ditësh, krijojmë një ekip ku secili merr pjesë aktive në procesin e lundrimit. Kjo është një përvojë kolektive, ku bashkëpunimi dhe ndihma e njëritjetrit janë thelbësore. Lundrimi ka dy forca kryesore që e përcaktojnë përjetimin e tij: forcën e erës dhe forcën e detit. Kur këto dy forca ndërveprojnë me velat e anijes, krijohet një ndjenjë e lirisë dhe një përvojë mistike që është vërtet e paharrueshme. Kjo përvojë e lundrimit të ofron mundësinë për të ndjerë se je në harmoni të plotë me natyrën, dhe ndihesh sikur të përkufizohet një liri e thellë dhe një energji që është më shumë se thjesht fizike.
Nistori: sa është e vështirë që të drejtohet një anije?
Jeton Asani: drejtimi i një anijeje nuk është një detyrë e lehtë dhe kërkon shumë përvojë dhe njohuri të veçanta. Ajo nuk është diçka e thjeshtë dhe naive, sepse lundrimi përfshin një sërë faktorësh që kërkojnë kujdes dhe aftësi të zhvilluara, përfshirë manovrimin e anijes në kushte të ndryshme të detit dhe motit. Për këtë arsye, drejtimi i një anijeje kërkon jo vetëm përkushtim, por edhe një leje të posaçme për vozitje. /Nistori/
