Seanca përgatitore për Ligjin për gjuhët është caktuar për 19 qershor, deklaroi Kryetari i Gjykatës Kushtetuese, Darko Kostadinovski. Në një intervistë për Triling, ai shpjegoi se për shkak të tragjedisë në Koçan, Gjykata e shtyu seancën një herë, dhe vlerësimet e tij janë se pas zgjedhjeve lokale në vjeshtë, për të shmangur etnizimin dhe politizimin, do të ketë tashmë një vendim nga Gjykata, përcjell Nistori.
“Vlerësimi im është se vendimi përfundimtar do të merret pas zgjedhjeve. Nëse tragjedia nuk do të kishte ndodhur, seanca përgatitore do të kishte përfunduar tashmë dhe vendimi natyrshëm do të vinte diku në qershor. Pas seancës përgatitore, do të na duhet një muaj, një muaj e gjysmë, dy, për të përgatitur një raport të ri, për të sublimuar të gjitha mendimet e të gjithë pjesëmarrësve”, tha Kostadinovski.
Kryetari i Gjykatës Kushtetuese tha se askush nuk duhet të ketë frikë nga vendimet e gjykatës, sepse nuk bëhet fjalë për sulm ndaj të drejtave të askujt. Ai beson se është krijuar shumë bujë pa nevojë duke u dhënë veprimeve të gjykatës dimensione etnike dhe politike.
“Bindja ime e thellë është se në këtë fazë të zhvillimit të shoqërisë sonë, nuk kemi problem me marrëdhëniet ndëretnike. Kemi një lloj tjetër problemi, dhe ai është abuzimi i marrëdhënieve ndëretnike për qëllime politike. Kjo është ajo që kemi parë gjatë gjithë periudhës së kaluar, përfshirë edhe pas procedurave në lidhje me “Balancuesin” dhe Ligjin për Gjuhët”, shtoi Kostadinovski.
Partia opozitare BDI reagoi ndaj deklaratave të Kryetarit të Gjykatës Kushtetuese, Darko Kostadinovski, duke pretenduar se Gjykata Kushtetuese nuk fshihet më pas neutralitetit dhe po vepron si një “zgjatje parapolitike e qeverisë aktuale”. /Nistori/
