Në një intervistë për revistën javore Fokus, ambasadorja e ShBA-së Angela Aggeler foli për disa tema aktuale dhe u dërgoi mesazhe të qarta politikanëve. Ajo tha se, qofshin në opozitë apo në pushtet, partitë duhet të përqendrohen në promovimin e mirëqenies së të gjithë vendit – jo vetëm të një grupi, përcjell Nistori.
Fokus: le të hapim temën e kahershme – anëtarësimin në BE. Tema që më ka përshkuar gjithë jetën për 35 vjet. Disa thonë se asgjë nuk do të ndryshojë gjatë mandatit të kësaj qeverie. Meqenëse mosmarrëveshja bullgare ende po e bllokon situatën, cila është alternativa?
Aggeler: nëse do ta kisha përgjigjen, nuk do ta diskutonim ende këtë. Nuk e di nëse ka ndonjë alternativë tani. Udhëheqës të lartë shtetërorë – kryeministri, ministri i jashtëm, ministri i mbrojtjes dhe ministra të tjerë – janë shpesh në Bruksel, ku zhvillojnë bisedime me zyrtarë të lartë të BE-së. Si ambasadore e ShBA-së, besoj fuqimisht se Maqedonia e Veriut i takon BE-së. Gjeografikisht, politikisht dhe strategjikisht, ka logjikë. Edhe pse ShBA-të nuk janë pjesë e BE-së, ne i shohim qartë përfitimet që do t’u sjellë qytetarëve të RMV – tregtinë, infrastrukturën, sundimin e ligjit dhe reformat kundër korrupsionit. E kuptoj zhgënjimin. Ju e ndryshuat emrin, flamurin, bëtë lëshime të mëdha. Megjithatë, qëllimi është ende i paarritshëm. Por këto vendime – sado të vështira, duhet të merren. Brukseli nuk është një zë i vetëm; është një aleancë komplekse shtetesh. Është gjithmonë zhgënjyese kur retorika bëhet pa nevojë armiqësore nga ndonjë anëtar. Nevojitet dialog, pragmatizëm dhe veprim. Unë besoj se ka mbështetje të fortë në Bruksel dhe se udhëheqësit maqedonasë duhet ta shfrytëzojnë mundësinë përpara se ajo t’u ikë nga duart.
Fokus: po sikur të mos ndërmerren masa? Sikur të mbetemi në këtë gjendje pasigurie?
Aggeler: edhe nëse anëtarësimi në BE ngec, ne nuk po qëndrojmë në vend. Ne punojmë me këtë qeveri dhe qytetarët e saj në shumë, shumë fusha që pasqyrojnë qëllimet tona të përbashkëta. Bisedat e mia këtu përqendrohen në çështje kyçe – diversifikimi i energjisë, zhvillimi ekonomik, siguria kombëtare dhe modernizimi ushtarak, sundimi i ligjit, arsimi, kujdesi shëndetësor, mundësitë reale për qytetarët – lista është e gjatë. Korrupsioni mbetet një pengesë e madhe për rritjen ekonomike. Është e vështirë të tërheqësh investitorë ose të ndërtosh kompani të suksesshme kur ekziston ndjesia se ka kosto të fshehura dhe praktika të padrejta. Misioni ynë është të ndihmojmë Maqedoninë e Veriut të përparojë. Ne duam të shohim siguri ekonomike, mundësi për të rinjtë dhe mirëqenie. Sigurisht, ne do të vazhdojmë të mbështesim vendimet e vështira për BE-në, por angazhimi ynë nuk varet nga kjo. Ne jemi këtu për ta ndihmuar këtë vend të ketë sukses. /Nistori/
