Rritja e çmimeve të qirave të apartamenteve, veçanërisht në kryeqytet, po shkakton shqetësim dhe zemërim tek popullsia lokale, e cila po e ka gjithnjë e më të vështirë të përmbushë kërkesat financiare për strehim. Sipas agjencive të pasurive të paluajtshme, çmimi minimal për një apartament me një dhomë gjumi në zonën qendrore kohët e fundit ka arritur dhe tejkaluar 300 euro në muaj, një trend që dukej i paimagjinueshëm dy ose tre vjet më parë.
Një nga arsyet që kontribuan në këtë rritje është fluksi i punëtorëve dhe studentëve të huaj, të cilët kanë ardhur në vend masivisht në dy vitet e fundit. Ky grup konsumatorësh, veçanërisht punëtorët nga vendet aziatike, u treguan si një faktor kyç që ndikon në kërkesë dhe me këtë i shtynë çmimet lart.
Qytetarët e Shkupit thonë se situata po bëhet kritike dhe për shumicën e familjeve pasi kosto të tilla janë të papërballueshme. “Brenda një viti, qiraja ime është rritur me gati 100 euro. Më parë paguaja 250 euro, ndërsa tani për të njëjtin apartament prej 40 metrash katrorë paguaj 340 euro. Kjo është shumë e shtrenjtë, por nuk kam zgjidhje tjetër”, tha një qytetare, e cila jeton në Qendër dhe punon si infermiere në një klinikë private.
Nga ana tjetër, qiradhënësit e shohin këtë si një periudhë fitimi. Ata e pranojnë se prania e punëtorëve të huaj u sjell atyre siguri dhe fuqi më të mirë të pagesës krahasuar me qiramarrësit vendas. “Ja jap apartamentin tim me qira një kompanie të huaj IT që ka më shumë punonjës në Shkup nga India dhe Pakistani. Ata nuk kanë problem të pranojnë një çmim më të lartë sepse kompanitë e tyre mbulojnë kostot e strehimit”, shpjegon një pronar i një apartamenti në lagjen Kapishtec.
Ekonomistët dhe ekspertët e pasurive të paluajtshme theksojnë se trendi nuk do të ndryshojë së shpejti. “Ndërsa ka një fluks të fortë punëtorësh të huaj dhe profesionistësh të vetëpunësuar, qiratë do të jenë të larta. Shkupi dhe qytete të tjera të mëdha do të duhet të përshtaten me këtë realitet të ri. Banorët vendas do të duhet të përballen me çmime më të larta ose të zhvendosen në periferi, ku qiratë janë ende më të përballueshme”, thotë Marko Nikolov, një ekspert i pasurive të paluajtshme.
Ndërkohë, shumë qytetarë po shqyrtojnë mundësinë e zhvendosjes në vendbanime më të vogla, edhe pse kjo do të thotë shpenzime dhe kohë shtesë për transportin për në punë. Për momentin, një zgjidhje e përhershme për këtë rritje çmimesh nuk është në horizont, ndërsa kërkesa nga punëtorët e huaj vazhdon të rritet dhe tregu i pasurive të paluajtshme mbetet një sfidë për banorët vendas. /Koha/
