Shkronja e përsosur V dhe tufat e zogjve janë një imazh që fëmijët e vizatojnë instinktivisht. Por kjo formë klasike nuk është thjesht për bukuri, ajo është një strategji e zgjuar mbijetese
Kur zogjtë fluturojnë në formacion V, ata kursejnë energji duke përfituar nga rrjedha ngritëse e ajrit që krijohet nga krahët e zogut para tyre. Pajisjet gjurmuese vendosur mbi zogj kanë treguar se ata pozicionohen me kujdes dhe sinkronizojnë lëvizjet e krahëve, për të përfituar maksimalisht nga kjo forcë.
Kjo teknikë, e njohur si “draping”, është më e zakonshme tek zogjtë e mëdhenj si rosat dhe pelikanët. Zogjtë më të vegjël nuk mund të përfitojnë në të njëjtën mënyrë për shkak të madhësisë së trupit dhe rrymave më të ndërlikuara të ajrit që krijojnë.
Një studim i vitit 2014 nga Universiteti Mbretëror Veterinar i Londrës konfirmoi se zogjtë i sinkronizojnë rrahjet e krahëve për të qëndruar në zonën më efikase të rrjedhës së ajrit. Kjo mënyrë fluturimi redukton shpenzimin e energjisë deri në 20%, çka është thelbësore gjatë migrimeve të gjata.
Veç aspektit aerodinamik, formacioni V luan rol edhe në organizimin social të tufës. Zogu që udhëheq merr barrën më të madhe të rezistencës së ajrit, por pas një kohe zëvendësohet nga një tjetër, duke garantuar barazi dhe efikasitet. Sipas një studimi të vitit 2015 nga Universiteti i Bernës, zogjtë e ndajnë këtë përgjegjësi në mënyrë të balancuar, duke rritur kohezionin e grupit.
Migrimi është një përpjekje ekstreme. Gjatë këtij udhëtimi, shkalla e vdekshmërisë së shpendëve rritet deri në gjashtëfish, për shkak të lodhjes, urisë, sëmundjeve dhe grabitqarëve. Çdo kursim energjie është një avantazh jetik.
Fluturimi në formacion gjithashtu përmirëson komunikimin vizual ndërmjet zogjve, ndihmon në ruajtjen e distancës dhe shmang përplasjet, madje është një nga arsyet pse zogjtë nganjëherë godasin dritaret.
Megjithëse jo të gjithë zogjtë migrues e përdorin këtë teknikë, kolibrat apo harabelat janë tepër të vegjël, për shumicën, formacioni V është një kombinim i sofistikuar i bashkëpunimit, strategjisë dhe mbijetesës.
Herën tjetër që shihni në qiell një tufë në formë V, kujtoni: nuk është vetëm një pamje e bukur, është një shembull i mahnitshëm i inteligjencës së natyrës në veprim. Dhe jo, shprehja “me tru shpendësh” nuk është aspak e drejtë.
