I pandehuri, i punësuar si bashkëpunëtor i lartë për logjistikë dhe punë në terren në Universitetin Shtetëror të Tetovës, nga marsi i vitit 2020 deri në shkurt të vitit 2023 ka keqpërdorur detyrën e tij zyrtare. Në vend që t’i depozitonte në llogarinë e Universitetit paratë e gatshme që i ishin besuar nga studentët e Fakultetit të Shkencave Natyrore dhe Matematikës, Fakultetit të Mjekësisë dhe Fakultetit të Edukimit Fizik, si pagesa për pjesëmarrje, bashkëfinancim dhe shpenzime të tjera të studimeve, ai i ka përvetësuar ato për vete, përcjell Nistori.
Drejtoria e Policisë Financiare ka ngritur kallëzim penal kundër A.Z., punonjës i Universitetit Shtetëror të Tetovës, nën dyshimin për keqpërdorim të detyrës dhe autoritetit zyrtar, si dhe për falsifikim dokumentesh.
Sipas Policisë Financiare, me këto veprime i dyshuari ka përfituar në mënyrë të kundërligjshme 3.362.272 denarë, ose pothuajse 55 mijë euro, ndërsa për të njëjtën shumë ka dëmtuar buxhetin e Universitetit Shtetëror të Tetovës.
“Për të fshehur përvetësimin e kundërligjshëm të mjeteve financiare dhe gjurmët e veprës penale, i dyshuari ka përgatitur fatura të falsifikuara për pagesa të pretenduara të kryera përmes aplikacionit E-pay, të cilat ua ka dorëzuar studentëve si dëshmi pagese. Për përgatitjen e tyre ai ka përdorur të dhëna, përfshirë edhe kodin QR, nga një faturë autentike për një pagesë të realizuar përmes E-pay me kartelën bankare të motrës së tij. Më pas, ai e ka modifikuar faturën duke ndryshuar të dhënat për paguesin, shumën dhe datën e pagesës, dhe ua ka dorëzuar studentëve si faturë të vlefshme. Studentët, duke besuar se pagesa ishte kryer, i kanë ngarkuar faturat në sistemin elektronik dhe njëkohësisht i kanë dorëzuar në shërbimin studentor si dëshmi pagese”, njofton Drejtoria e Policisë Financiare. /Nistori/
*Burimi: 360
