Banorët e Komunës së Bërvenicës sot, më 1 nëntor, u drejtohen kutive të votimit për të zgjedhur kryetarin e ri të komunës. Në raundin e dytë të zgjedhjeve të parakohshme lokale përballen Arkin Jahiji nga Aleanca Kombëtare për Integrim (AKI) dhe Stojanço Radiçevski nga koalicioni „Maqedonia jote”, i udhëhequr nga VMRO-DPMNE. Votimi vjen pas raundit të parë të 18 tetorit, në të cilin asnjëri prej gjashtë kandidatëve nuk arriti të siguronte shumicën e nevojshme për t’u zgjedhur kryetar komune, përcjell Nistori.
Sipas të dhënave të Komisionit Shtetëror të Zgjedhjeve (KShZ), në raundin e parë të drejtë vote kishin 16.256 qytetarë, ndërsa në votim morën pjesë 7.565 prej tyre, përkatësisht 46,56 për qind e trupit zgjedhor.
Radiçevski doli i pari me rreth 2.945 vota, ndërsa Jahiji u rendit i dyti me 2.152 vota. Pas tyre u renditën Jakup Huseini nga VLEN-i, me 1.529 vota, dhe Jovica Radeski nga LSDM-ja, me 707 vota. Dy kandidatët e pavarur, Dushan Bogdanovski dhe Arife Idrizi, morën përkatësisht 57 dhe 21 vota.
Megjithatë, rezultati i raundit të parë nuk përcakton përfundimin e garës së sotme. Me vetëm dy kandidatë në fletëvotim, rëndësi të veçantë merr pjesëmarrja e qytetarëve, përfshirë votuesit që në raundin e parë mbështetën kandidatët e eliminuar, si dhe ata që nuk dolën fare në votime.
Në aspektin politik, zgjedhjet në Bërvenicë kanë tërhequr vëmendje përtej kufijve të kësaj komune. Gara zhvillohet ndërmjet kandidatit të koalicionit të udhëhequr nga VMRO-DPMNE-ja, parti që drejton pushtetin qendror, dhe kandidatit të AKI-së, koalicion opozitar i udhëhequr nga BDI-ja.
Përveç përballjes ndërmjet dy blloqeve politike, procesi zgjedhor ka nxjerrë në pah edhe çështjen e bashkëpunimit ndërmjet partive shqiptare, veçanërisht pas eliminimit të kandidatit të VLEN-it në raundin e parë. Mbetet të shihet se si do të reflektohet në rezultatin përfundimtar shpërndarja e votave të kandidatëve që nuk janë më në garë.
Në qendër të fushatës zgjedhore kanë qenë edhe problemet e përditshme të banorëve, përfshirë furnizimin me ujë të pijshëm, kanalizimin, infrastrukturën rrugore, arsimin, shërbimet publike dhe zhvillimin ekonomik lokal. Për kryetarin e ardhshëm, këto çështje do të përbëjnë një pjesë të rëndësishme të përgjegjësive gjatë drejtimit të komunës.
Zgjedhjet e parakohshme në Bërvenicë u shpallën pas vdekjes së kryetarit të deriatëhershëm, Jovica Ilievski, më 23 qershor të këtij viti.
Komisioni Shtetëror i Zgjedhjeve më 21 tetor konfirmoi përfundimisht rezultatet e raundit të parë, duke bërë të ditur se brenda afateve ligjore nuk ishte paraqitur asnjë ankesë për procesin e votimit apo për përcaktimin e rezultateve.
Ndërkohë, të shtunën, më 31 tetor, u zhvillua votimi për personat e sëmurë dhe të pafuqishëm, ndërsa heshtja zgjedhore kishte filluar në mesnatën ndërmjet së enjtes dhe së premtes.
Rezultati i votimit të sotëm do të përcaktojë se kush do ta drejtojë Komunën e Bërvenicës, ndërsa përbërja e mbështetjes elektorale për secilin kandidat do të jetë një tregues i rëndësishëm i raporteve politike në këtë komunë pas zgjedhjeve. /Nistori/
