Gjashtë punonjës policorë do të suspendohen dhe ndaj tyre do të iniciohet procedurë disiplinore për shkak të parregullsive të konstatuara gjatë ndërhyrjes policore të 7 tetorit në Shkup, rast ky që nxiti reagime të shumta pas pretendimeve për ushtrim të dhunës ndaj dy të rinjve shqiptarë, të moshës 21 dhe 23 vjeç, shkruan Nistori.
Këtë e ka bërë të ditur zëvendësministri i Punëve të Brendshme, Astrit Iseni, i cili njoftoi se Kontrolli i Brendshëm i Ministrisë së Punëve të Brendshme, pas shqyrtimit të incizimeve, deklaratave të dëshmitarëve dhe kontrolleve të kryera, ka konstatuar një sërë parregullsish në veprimet e punonjësve policorë.
Sipas Isenit, ndaj gjashtë policëve do të ndërmerren masa disiplinore, ndërsa procedurat për zbardhjen e plotë të rastit do të vazhdojnë edhe në drejtim të përcaktimit të përgjegjësisë eventuale penale.
“Gjashtë policët do të suspendohen, ndërsa ndaj tyre do të fillojë procedurë disiplinore. Përgjegjësia nuk përfundon me suspendimin. Po veprohet sipas urdhrave të prokurorive kompetente për ekspertizë dhe dokumentimin e plotë të provave, mbi të cilat do të përcaktohet përgjegjësia eventuale penale”, deklaroi Iseni.
Ai theksoi se uniforma policore nuk mund të shërbejë si mburojë për shkeljen e ligjit dhe se çdo keqpërdorim i autoritetit policor cenon dinjitetin e qytetarëve dhe besimin në institucionet shtetërore.
“As uniforma, as funksioni dhe as përkatësia nuk e përjashtojnë askënd nga zbatimi i ligjit. Qytetarët meritojnë siguri, dinjitet dhe një polici që e ushtron autoritetin me profesionalizëm”, u shpreh zëvendësministri.
Rasti që nxiti reagime politike dhe publike
Ngjarja e 7 tetorit në Shkup u bë objekt i debatit publik pas raportimeve se dy të rinj shqiptarë, të moshës 21 dhe 23 vjeç, ishin keqtrajtuar fizikisht gjatë një ndërhyrjeje policore.
Në pamjet e publikuara, të cilat u lidhën me incidentin, shiheshin persona të shtrirë përtokë dhe të lidhur, ndaj të cilëve ushtrohej dhunë. Autenticiteti dhe rrethanat e incizimeve ishin ndër çështjet që kërkohej të verifikoheshin nga institucionet kompetente.
Rasti shkaktoi reagime nga partitë opozitare shqiptare. Bashkimi Demokratik për Integrim (BDI) kërkoi dorëheqjen e zëvendësministrit Astrit Iseni, ndërsa Lidhja Shqiptare (LSH) kërkoi edhe dorëheqjen e ministrit të Punëve të Brendshme, Pançe Toshkovski, si dhe përfshirjen e faktorit ndërkombëtar në ndjekjen e rastit.
Ndërkohë, Ministria e Punëve të Brendshme kishte njoftuar më herët se Departamenti për Kontroll të Brendshëm, Hetime Penale dhe Standarde Profesionale po ndërmerrte veprime për përcaktimin e rrethanave të incidentit dhe përgjegjësisë së mundshme të zyrtarëve policorë.
Njoftimi i fundit i Isenit konfirmon se kontrolli i brendshëm ka konstatuar parregullsi dhe se janë paralajmëruar masa ndaj gjashtë policëve.
Megjithatë, suspendimi dhe procedura disiplinore nuk nënkuptojnë automatikisht përgjegjësi penale. Kjo e fundit mbetet të përcaktohet në bazë të provave, ekspertizave dhe veprimeve të organeve kompetente të drejtësisë.
