Unioni i Nxënësve të Shkollave të Mesme konstaton me keqardhje se nxënësit e shkollave të mesme në Shkup këtë vit nuk i kanë marrë produktet falas të premtuara për higjienën menstruale. Edhe pse kjo masë u mbështet gjerësisht nga publiku, ajo nuk u zbatua gjatë vitit 2022, transmeton Meta.mk.
“Shumë herë ka ndodhur që nxënësit e shkollave të mesme të organizohen për të sjellë në shkollat e mesme produkte të higjienës menstruale. Duke pasur parasysh se produktet e higjienës menstruale nuk janë luks, Unioni mbështet parimin se ato duhet të ofrohen pa pagesë në shkollat e mesme në mbarë Maqedoninë – dhe natyrisht masën e duhur në Qytetin e Shkupit”, thuhet në njoftimin e Unionit.
Nga atje e mirëpresin dyfishimin e buxhetit për produkte higjienike menstruale falas për vitin 2023 në Shkup dhe u bëjnë thirrje institucioneve të qytetit që ta zbatojnë këtë masë, e cila është kundër të ashtuquajturës taksa rozë.
“Së shpejti duhet të zbatohet ulja e paralajmëruar e tarifës së TVSH-së për produktet e higjienës menstruale në nivel shtetëror”, theksojnë nga atje.
Unioni u bën thirrje të gjithë personave përgjegjës që të ndërmarrin politika specifike për uljen e varfërisë menstruale te vajzat e shkollave të mesme.
“Ne bëjmë thirrje për një konsensus politik, veçanërisht te politikanet gra dhe kërkojmë zbatimin e menjëhershëm të produkteve të premtuara falas për higjienën menstruale në shkollat e mesme të Shkupit”, thonë nga Unioni.
Reagimi i Unionit vjen pasi Meta.mk raportoi se autoritetet e qytetit nuk kanë ofruar falas produkte menstruale për shkollat e mesme. Në fund të dhjetorit të vitit të kaluar, Këshilli i Qytetit të Shkupit, pas amendamentit të propozuar nga këshilltarja Teodora Krstevska, votoi që nga buxheti i qytetit të ndahen 2.000.000 denarë, të cilat do të ndahen për sigurimin e produkteve menstruale falas për shkollat e mesme.
