Para ca ditësh ndërroi jetë një kolege me të cilën punonim në Agjencinë e Zbatimit të Gjuhës të RMV-së. U desh një mort e një varrim, që të kuptoja se diku thellë, në Bashkinë e Zelenikovës, mes malesh jo shumë të larta, është një fshat me shqiptarë, është Smesnica, shkruan Horizont.
Me t’u kthyer në shtëpi, kërkova informacione dhe kuptova që, sipas Regjistrimit 2021, fshati ka 59 banorë, nga të cilët, 45 janë shqiptarë, e 14 pa të dhëna. Ndërkaq, Zelenikova në tërësi ka 3361 banorë, prej të cilëve, 415 janë shqiptarë.
Një rrugë e ngushtë, ca shtëpi të reja, e ca me tulla balte, një shkollë e një xhami, ca automjete në disa shtëpi. Dikush kish punuar arën, pra ende jeton aty.
I përshtatshëm për bujqësi e blegtori, dikush në fshat punonte tokën, e dikush merrej edhe me bletari.
Në fshatin që s’e kisha dëgjuar më parë, varrosëm një njeri aty.
Renatë, të qoftë dheu i lehtë!
