Deri në tetor, dyzetë parashtresa nga fusha e mjedisit jetësor sivjet kanë mbërritur në zyrën e Avokatit të Popullit. Gjysma e tyre janë për cilësinë e ajrit dhe 20 të tjera janë për aspekte të tjera të mjedisit të rrezikuar. Këtë e theksoi edhe avokati Naser Ziberi, përcjell Nistori.
“Megjithatë, më gëzon fakti që në këtë konferencë kemi përfaqësues nga Gjykata Supreme dhe avokatë të popullit nga shumë shtete, me kontributin e të cilëve do t’i forcojmë kapacitetet,” deklaroi Ziberi, duke shtuar se neni 43 i Kushtetutës së RMV-së garanton mjedis të shëndetshëm.
Pjesëmarrës në konferencë ishte edhe ministri për ekologji, Izet Mexhiti.
“Si Qeveri jemi të përkushtuar seriozisht në krijimin dhe zbatimin e politikave për reduktimin e presionit që njerëzit e ushtrojnë mbi mjedisin, mbrojtjen dhe përmirësimin e cilësisë së mjedisit njerëzor, por edhe sigurimin
e mbrojtjes së vetë natyrës dhe biodiversitetit”, deklaroi Mexhiti.
Konferenca ndërkombëtare me temë “Ombusmanët dhe Institucionet Kombëtare për të Drejtat e Njeriut dhe Mjedisin”, do të vazhdojë edhe nesër në Shkup në kuadër të projektit “Përmirësimi i rolit të Avokatit të Popullit në drejtësinë mjedisore”.
