Përfitimet ose pasojat e arsimit (të dobët) cilësor në një vend dhe shoqëri perceptohen kur brezat që kaluan procesin arsimor dhe morën dëshmi formale (në formën e diplomave) të një shkalle të caktuar ekspertize për profesionin që zgjodhën të studionin dhe do të fitojnë aftësi do të përfshihen në tregun e punës për t’i bërë njohuritë e tyre efektive, si për përparimin ekonomik dhe social të tyre ashtu edhe për shoqërinë.
Pas zhvendosjes së procesit arsimor në dy vitet e fundit pandemike me mësimin onlajn, këtë vit një pjesë e madhe e mësimit rrezikohet nga kërcënimet e rreme me bomba në shkolla. Veç kësaj, në sfond, si një realitet që duhet pranuar, herë pas here thuhet se këtë vit thjesht nuk ka tekste për disa lëndë, qoftë edhe për breza të tërë. Viti shkollor po përfundon dalëngadalë dhe Ministria e Arsimit dhe Shkencës ende nuk i ka furnizuar nxënësit e shkollave të mesme me të gjitha tekstet mësimore. Ministri i Arsimit dhe Shkencës, Jeton Shaqiri, praktikisht ka bërë të ditur se Ministria ende qëndron në faktin se nuk do t’i shtypë të gjitha tekstet shkollore.
“Realisht nuk kemi para për tekste për të gjitha lëndët në arsimin e mesëm. Sipas informacioneve që kam tani, nuk besoj se mund ta mbyllim tërësisht arsimin profesional me tekste, sepse bëhet fjalë për shumë lëndë. Nuk i kemi të gjitha lëndët për arsimin e mesëm. Për shkollën fillore janë paraparë të gjitha lëndët për konceptin e ri dhe do të plotësohet pjesa që ka mbetur për arsimin e mesëm”, pranoi hapur ministri Jeton Shaqiri.
Profesori universitar Ariton Rama, konsideron se lëshimet dhe plogështia në arsimin e lartë, me prodhimin e kuadrove për mësimdhënie në arsimin fillor dhe të mesëm, më vonë kthehen si efekt i keq në gjeneratat e ardhshme që vijnë në universitete.
“Mungesa e kriterit arsimorë në artikulimin e vlerësimit shpalos llumin profesional që është shndërruar në një antivlerë shoqërore. Cilësia elitare arsimore në vendin tonë kronologjikisht është degraduar nga ai i ulët më notë me hatër deri një notë në indeks për një punësim. Pra, fakt krucial mbetet definimi i mos interesit për notën meritore dhe përgjegjësinë e dhënies së notës nga ana tjetër, sot nuk japim motiv për jetë-mësim por japim notë për ekzistencë jetësore, është e qartë se ky mentalitet jetësor ka arritur të perceptojë një finalizim të një shoqërie me rendje të lirë ku kriteri, disiplina, angazhimi dhe përkushtimi intelektual janë një kiç i një hiçi”, u shpreh Rama.
Në një anketë të Institutit për Hulumtime Politike në Shkup, shumica e qytetarëve mendojnë se sot kemi arsim më të keq, krahasuar me pesë vjet më parë. Rreth 56.3 për qind e të anketuarve ndajnë këtë qëndrim, krahasuar me 25 për qind, të cilët nuk shohin ndonjë ndryshim. Vetëm 9.6 për qind e të anketuarve thonë se arsimi i sotëm është në një nivel më të lartë krahasuar me situatën e pesë viteve më parë.
Në pyetjen tjetër, 49 për qind e të anketuarve thonë se cilësia e procesit arsimor në Maqedoni është më e keqe në krahasim me vendet e rajonit. Një e katërta mendojnë se është e ngjashme, ndërsa vetëm 5,7 për qind mendojnë se Maqedonia ka arsim më të mirë se vendet e rajonit. /koha/
