Asllani: Nuk ka asnjë arkeolog shqiptar, ciceroni merr trefish rrogë më shumë se një arkeolog
Drejtori i Drejtorisë së Mbrojtjes së Trashëgimisë Kulturore, Arian Asllani, në Click Plus TV21, duke folur për gjetjen e varrezave antike në Shkup tha se nuk ka asnjë arkeolog shqiptar. Sipas drejtorit, problemi tjetër janë rrogat e ulëta, ku nuk i kalojnë 25 mijë denarë, përcjell Nistori.
“Nuk ka asnjë arkeolog shqiptar. Shtatë kërkesa kam lëshuar për punësime, të gjitha kanë ardhur negative. Problematikë tjetër është se për një arkeolog, rroga është shumë e vogël. Një ciceron e ka rrogën mbi 50 mijë denarë, as një e treta nuk është te ne. Një arkitekt nuk vjen tek unë për 24 mijë denarë, nuk pranon askush. Një inspektor pas një viti eksperencë i bëhet rroga 30 mijë denarë”, tha Asllani.
Përgjatë Vardarit mund të ketë mbi 400 varreza antike
Asllani, tha se përgjatë Vardarit mund të jenë mbi 400 varreza antike, duke qenë se janë me shtresa-shtresa, njëra mbi tjetërn.
“Përgjatë Vardarit në Shkup mund të jenë edhe 400 varreza, jo vetëm 100 siç flitet. Për arsye se këto varreza janë me disa shtresa, njëra mbi tjetrën”, tha Asllani.
