Komandanti i Njësitit të Zjarrfikësve në Tetovë, Avni Ameti është nderuar me titullin “Ambasador i Paqes dhe i të Drejtave të Njeriut”, një vlerësim i akorduar nga organizata Global Socio-Economic and Financial Evolution Network (GSEFEN), me seli në Angli, përcjell Nistori.
Ky vlerësim përbën një moment të rëndësishëm për Avni Ametin, duke vënë në pah rëndësinë e angazhimit për promovimin e paqes, mbrojtjen e të drejtave të njeriut dhe forcimin e vlerave të bashkëjetesës dhe mirëkuptimit ndërmjet njerëzve.
Pas marrjes së këtij titulli, Avni Ameti ka shprehur krenarinë dhe mirënjohjen e tij për këtë nderim, duke falënderuar në mënyrë të veçantë Tahir Shabanin, Ambasador dhe Lider për Paqen Botërore, si dhe President i Institutit në Europë, për rekomandimin dhe përkrahjen e tij.
“Jam krenar që u nderova me titullin Ambasador i Paqes dhe i të Drejtave të Njeriut nga organizata Global Socio-Economic and Financial Evolution Network, me seli në Angli”, është shprehur Ameti, duke vlerësuar veçanërisht mbështetjen e Tahir Shabanit.
Ky vlerësim shërben si një motivim shtesë për të promovuar paqen, respektimin e të drejtave dhe lirive themelore të njeriut, si dhe bashkëpunimin ndërmjet individëve dhe komuniteteve.
Nderimi i Avni Ametit me këtë titull vjen si një rast për të theksuar rëndësinë e angazhimit të vazhdueshëm për një shoqëri më paqësore, më të drejtë dhe më gjithëpërfshirëse. /Nistori/
