Aleanca për Shqiptarët, Alternativa dhe VMRO-DPMNE-ja nuk do ta mbështesin propozim ligjin për ndryshimin e gjinisë.
Aleanca për Shqiptarët (ASh)
“Angazhohemi për ruajtjen e vlerave familjare dhe institucionin e familjes, si dhe luftimin e dukurive që sulmojnë këtë ind themelorë të shoqërisë”, thonë nga Aleanca për Shqiptarët.
Alternativa (AAA)
“Për ne është e papranueshme të rrënohet familja tradicionale dhe të lejohet një tip tjetër i organizimit social që dëshiron të abuzojë me nocionin familje”, njoftojnë nga Alternativa.
VMRO-DPMNE
“VMRO-DPMNE-ja është kundër kësaj zgjidhje ligjore e cila krijon bazë që në të ardhmen të ndryshohet Ligji për familjen në të cilin rregullohet martesa dhe familja si bashkësi mes një femre dhe një mashkulli”, theksojnë nga VMRO-DPMNE.
LSDM
Nga LSDM-ja thonë se ky ligj ka për qëllim mbrojtjen e qytetarëve dhe buxhetit shtetëror nga vendimet gjyqësore në Strasburg.
“Për shkak se falë kësaj çështje shteti paguan dëmshpërblim si pasojë e vendimeve në Gjykatën për të drejtat e njeriut në Strasburg, detyrim i jonë mbetet t’i mbrojmë qytetarët dhe buxhetin”, thonë nga LSDM.
BDI
BDI-ja zgjodhi të heshtë, ndërsa zëvendësministri i të Drejtësisë nga radhët e BDI-së, Agim Nuhiu i tha televizionit Alsat se mendimi i tij është që ky ligj duhet të tërhiqet dhe të gjinden modalitetet me të cilat do të plotësohet standardet e drejtësisë Evropiane por mbi gjitha do të reflektohet edhe realiteti i shoqërisë në vendin tonë.