Përballja me mungesën e insulinës të personave me diabet është një shqetësim serioz, dhe kjo situatë ka shkaktuar reagim të madh në Maqedoni. Mungesa e insulinës, e cila është thelbësore për trajtimin e diabetit, mund të rrezikojë shëndetin e pacientëve dhe të shkaktojë pasoja të rënda, duke përfshirë komplikacione të rëndësishme shëndetësore.
Në këtë kontekst, kërkesa e personave me diabet për sigurinë e plotë të terapive të insulinës është e natyrshme dhe e justifikueshme. Ata kërkojnë që Qeveria të sigurojë furnizim të mjaftueshëm dhe në kohë me këtë medikament jetik, për të parandaluar ndërlikime dhe për të siguruar cilësinë e jetës.
Kryetari i Lidhjës së Shoqatave të Diabetikëve, Dime Velev, i ka bërë thirrje Ministrisë së Shëndetësisë dhe Qeverisë që urgjentisht të fillojnë me dërgimin e plotë të insulinës dhe terapisë antidiabetike në farmacitë e insulinës, sipas nevojave dhe numrit të pacientëve ekzistues.
“Apelojmë tek farmacitë e insulinës që të mos ofrojnë gjysmë terapi ose ilaçe zëvendësuese, e cila duhet të përshkruhet ekskluzivisht nga mjeku endokrinolog. I bëjmë thirrje anëtarëve tanë që të ndihmojnë njëri-tjetrin duke marrë hua terapinë që na mungon pa pranuar ndryshimin administrativ të saj në farmaci. U bëjmë thirrje të gjitha palëve të interesuara të gjejnë një mënyrë për të ofruar terapinë e nevojshme pa asnjë zgjidhje administrative ose, më saktë, improvizime që do të prishin kontrollin tonë të sheqerit, dhe rrjedhimisht shëndetin tonë”, ka apeluar Velev, ndërsa ka akuzuar që problemi është shkaktuar nga Fondi i Shëndetësisë dhe Ministria që kanë vonuar procedurat e tenderimit për sigurimin e insulinës.
“U bëjmë thirrje të gjithëve të mos e humbin durimin dhe mirëkuptimin tonë për këtë situatë, e cila jemi të vetëdijshëm se do të ishte evituar nëse të gjitha proceset tenderuese do të kishin filluar me kohë pa vonesa apo arsyetime”, ka thënë kryetari i Lidhjes së Shoqatave të Diabetikëve, Dime Velev.
Në ndërkohë, për të përmirësuar situatën, nga Lidhja thonë se është e nevojshme që Qeveria dhe institucionet shëndetësore të rrisin investimet në sistemet e furnizimit me barna dhe të krijojnë politika që garantojnë që njerëzit me diabet – të kenë qasje në trajtimet e nevojshme pa vonesa.
“Kjo do të ndihmonte në përmirësimin e shëndetit të pacientëve dhe në uljen e pasojave të mundshme të mungesës së insulinës. Përveç kësaj, sensibilizimi i opinionit dhe përfshirja e organizatave të shëndetit dhe shoqatave të pacientëve mund të luajë një rol të rëndësishëm në krijimin e presionit për zgjidhjen e këtij problemi”, reagon Velev. /Koha/
