Prokuroria Publike po vazhdon hetimet për rastin në të cilin Fatmata, emigrante nga Sierra Leone, u qëllua me armë zjarri në afërsi të Gjevgjelisë nga një polic. Prokurori publik në fjalë ndërmori të gjitha veprimet e nevojshme për zbardhjen e rastit. Pas marrjes së raportit nga gjetjet e autopsisë, prokurori publik do të vendoset për rrjedhën e mëtutjeshme të procedurës.
Prokurori në fjalë nga Departamenti i Specializuar për ndjekjen e krimeve të kryera nga persona me kompetenca policore dhe pjesëtarë të policisë së burgjeve, deri në Gjykatën Themelore Penale – Shkup, ka kërkuar që ndaj policit të dyshuar të caktohen masa paraprake.
“Gjyqtari i procedurës paraprake e ka pranuar propozimin dhe e ka urdhëruar të dyshuarin që herë pas here të paraqitet te një zyrtar i caktuar apo te organi kompetent shtetëror dhe atij i është konfiskuar përkohësisht dokumenti i udhëtimit apo ndonjë dokument tjetër për kalimin e kufirit shtetëror, përkatësisht ndalim për dhënien e tij”, thonë nga Prokuroria.
Fatmata u vra më 19 prill pasi një zyrtar qëlloi një plumb nga arma e tij zyrtare. Policia ka lëshuar një deklaratë për ngjarjen, por kjo deklaratë është në kundërshtim me atë që pretendojnë emigrantët të pranishëm, përfshirë edhe bashkëshortin e Fatmatës, Abu Bakar, i cili ka kërkuar azil në Maqedoni dhe kërkon të kërkojë drejtësi për gruan e tij përmes gjykatave.
Versioni i policisë për ngjarjen është se pasi emigrantët janë pikasur në dy automjete, policia ka tentuar t’i ndalojë dhe njëri prej kontrabandistëve, 26-vjeçari K.J. ka sulmuar fizikisht oficerin duke tentuar t’i marrë armën.
“Në të njëjtën kohë, punonjësi i policisë ka qëlluar nga pistoleta e shërbimit dhe ka goditur njërën nga emigrantet, e cila është transportuar menjëherë në urgjencë ku edhe ka ndërruar jetë”, njoftoi MPB ditën kur ndodhi ngjarja fatkeqe.
Por motra e Fatmasë, në një video-adresim për opinionin e Maqedonisë që e ka dërguar në redaksinë e “Sloboden Peçat”, u bën thirrje qytetarëve që të bashkohen me ta në kërkimin e drejtësisë dhe pyet pse një polic qëlloi një vajzë të paarmatosur, duke shtuar se nuk ka sulm fizik ndaj policit.
“Ministria e Brendshme pretendoi se polici ka qëlluar pasi ka pasur një sulm fizik mes shoferit dhe oficerit. Kjo nuk është e vërtetë. Aty ishte Ebu Bekri, aty ishin njerëz të tjerë: Nuk pati sulm fizik. Kjo është një gënjeshtër. Ne duam drejtësi për Fatmën dhe duam që populli i Maqedonisë të luftojë me ne. Ne duam të dimë të vërtetën. Pse polici qëlloi një vajzë të paarmatosur? Ne duam një gjykim të drejtë dhe transparent dhe përgjigje për pyetjet që na mundojnë. E vetmja gjë që mund të na japë pak qetësi, ose të paktën një lehtësim – është që të vërtetohet e vërteta për vrasjen e Fatmës dhe e gjithë bota ta dijë të vërtetën. Ju lutemi bashkohuni me ne në luftën për të vërtetën, ju lutemi bashkohuni me ne për të mos e harruar atë”, thotë ajo në adresimin e saj me video për qytetarët në Maqedoni.
