Klinika Universitare e Neurologjisë në Shkup aktualisht kujdeset për rreth 2.000 pacientë me sklerozë të shumëfishtë, prej të cilëve rreth 1.800 marrin trajtim aktiv. Numri i rasteve të reja vazhdon të rritet, ndërsa vetëm gjatë vitit 2025 janë diagnostikuar 115 persona me këtë sëmundje, përcjell Nistori.
Gjithsej 835 pacientë nga 48 komuna marrin terapi me barna imunomoduluese, të cilat mbulohen nga programi përkatës i trajtimit. Deri më tani, të gjithë këta pacientë e kanë marrë terapinë në Klinikën Universitare të Neurologjisë në Shkup.
Prej tyre, 491 jetojnë jashtë rajonit të Shkupit dhe shumë prej tyre detyrohen të udhëtojnë çdo muaj drejt kryeqytetit, shpesh të shoqëruar nga një familjar. Kjo nënkupton shpenzime shtesë, mungesa nga puna dhe vështirësi të tjera për personat që jetojnë me këtë sëmundje kronike.
Këto të dhëna u prezantuan gjatë nënshkrimit të memorandumit për decentralizimin e terapisë për pacientët me sklerozë të shumëfishtë, ndërmjet Klinikës Universitare të Neurologjisë, Spitalit Special për Ortopedi dhe Traumatologji „Shën Erazmi“ në Ohër, Spitalit të Përgjithshëm „8 Shtatori“ në Shkup dhe Spitalit Klinik të Shtipit.
Ministri i Shëndetësisë, Sasho Klekovski, deklaroi se decentralizimi do të mundësojë trajtimin e një numri më të madh pacientësh, duke ulur njëkohësisht ngarkesën mbi Klinikën Universitare të Neurologjisë. Ai bëri të ditur se buxheti i këtij viti për barnat kundër sklerozës së shumëfishtë arrin në 451 milionë denarë.
„Kjo do të jetë një lehtësim për pacientët, të cilët do të mund ta marrin terapinë më afër vendbanimit të tyre, por edhe një hap përpara për punonjësit shëndetësorë në spitalet rajonale, të cilëve do t’u zgjerohet fusha e veprimtarisë profesionale. Natyrisht, ky model mund të zbatohet edhe në fusha të tjera, siç është onkologjia“, deklaroi Klekovski.
Drejtori i Klinikës Universitare të Neurologjisë, Jovan Bozinovski, theksoi se kjo nismë është përgjigje ndaj kërkesave të kahershme të Shoqatës për Luftën kundër Sklerozës së Shumëfishtë.
„Rregullorja përcakton barnat, përgjegjësitë, kushtet që duhet të plotësojnë qendrat dhe procedurat përkatëse, ndërsa përmes protokollit, secili spital merr përsipër detyrimet e veta. Spitalet janë të detyruara të caktojnë një neurolog përgjegjës, një farmacist dhe infermierë të trajnuar, të sigurojnë ruajtjen dhe shpërndarjen e barnave sipas kushteve të përcaktuara, të regjistrojnë çdo dozë të administruar dhe të raportojnë reaksionet e padëshiruara brenda 24 orëve. Klinika ruan përgjegjësinë profesionale, financiare dhe organizative. Ajo siguron barnat, vendos për trajtimin e secilit pacient përmes Komisionit për Terapi Imunomoduluese, faturon terapinë në Fondin e Sigurimit Shëndetësor dhe kryen mbikëqyrje në qendrat rajonale të paktën një herë në vit“, shpjegoi Bozinovski.
Decentralizimi përfshin dhjetë barna, të ndara në dy grupe.
Grupi i parë përfshin barnat që pacientët mund t’i përdorin vetë, si interferonet, acetati i glatiramerit dhe barnat që merren nga goja, përkatësisht dimetil fumarati, teriflunomidi dhe kladribina. Këto barna do të mund të tërhiqen çdo muaj nga farmacia e spitalit rajonal përkatës.
Grupi i dytë përfshin barnat biologjike, si okrelizumabi, natalizumabi dhe ofatumumabi, të cilat, sipas protokollit të prezantuar, do të administrohen nga personeli shëndetësor në qendrat përkatëse.
Trajtimi fillestar do të vazhdojë të kryhet në Klinikën Universitare të Neurologjisë në Shkup, ku pacienti do të marrë dozën e parë, do t’i nënshtrohet trajnimit të nevojshëm dhe do të nënshkruajë formularin e pëlqimit. Dozat pasuese do të mund t’i marrë në qendrën rajonale. Kontrollet mjekësore do të zhvillohen çdo gjashtë ose dymbëdhjetë muaj, ndërsa do të mundësohen edhe konsultime në distancë.
Sipas Ministrisë së Shëndetësisë, në fazën e parë, Spitali Klinik i Shtipit do të mbulojë rajonet lindore, juglindore dhe të Vardarit, me rreth 128 pacientë. Spitali Special „Shën Erazmi“ në Ohër do të kujdeset për pacientët e rajonit jugperëndimor dhe të Pellagonisë, me rreth 146 pacientë, ndërsa Spitali i Përgjithshëm „8 Shtatori“ do të marrë përsipër trajtimin e 344 pacientëve nga rajoni i Shkupit.
Në këtë mënyrë, gjithsej 618 pacientë, ose 74 për qind e atyre që marrin terapi imunomoduluese, do të kenë mundësi ta marrin trajtimin në qendrat rajonale. Duke përfshirë edhe pacientët nga komunat kufitare, të cilët do të mund ta zgjedhin vetë qendrën e trajtimit, ky numër mund të arrijë në 692 pacientë, përkatësisht 83 për qind.
Kalimi në qendrat rajonale do të jetë vullnetar. Pacientët do të transferohen vetëm pasi të kenë dhënë pëlqimin me shkrim, ndërsa ata që nuk dëshirojnë ta ndryshojnë vendin e trajtimit do të vazhdojnë ta marrin terapinë në Klinikën Universitare të Neurologjisë në Shkup, pa asnjë cenim të së drejtës së tyre për trajtim. /Nistori/
