Ministri i Shëndetësisë, Venko Filipçe nëpërmjet një konference për media, sot njoftoi se dozën e tretë të vaksinës kundër Covid-19, përveç personave të moshës mbi 60 vjeç, mund ta marrin edhe qytetarët e tjerë të moshave më të reja.
“Informata e dytë është rekomandimi i Komitetit për imunizim, që përveç qytetarëve të moshuar dozën e tretë do të mund ta marrin edhe qytetarët e tjerë pa dallim, të moshës dhe pa dallim nëse kanë apo jo sëmundje tjera kronike”, tha Filipçe.
Në lidhje me masat e reja restriktive ai tha se nuk ka nevojë dhe se situata me Covid-19 po përmirësohet, nuk ka më mbingarkesë në spitale.
