-Gjendemi pranë ambulancës Sfillare të Poshtme e cila ka gjashtë muaj që është e mbyllur dhe kjo ndodhi për shkak që mjekja e cila ishte në detyrë ndërroi jetë.
Banorët ankohen që tani kanë mbetur pa mjeke amë, e si zgjidhje e vetme për kontrolle u ka mbetur të shkojnë në fshatrat përreth, gjë që jo çdoherë është e lehtë sepse u mungon transporti.
-Vdiq mjekja dhe nuk ka ardhur as një mjek.
Ku i bëni kontrollet mjekësore?
-Kontrollimet mjekësore i bëjmë në Saraj, Gjorçe, Kondovë.
A e kanë të vështirë t’iu pranojnë?
-Disa mjek nuk na pranojnë dhe kemi ngelur askund.
-Problem është shumë sepse jemi me pleq, jemi me njerëz të sëmurë, ka njerëz që nuk mund të lëvizin e thërrasim mjekun të vijë për pacientët, nuk dimë as ne çfarë të bëjmë rrugëdalje tjetër nuk ka.
Banorët pohojnë se kanë kërkuar zgjidhje nga Ministria e Shëndetësisë, por ende nuk kanë marrë përgjigje. Për këtë problematikë, drejtori i Shtëpisë së Shëndetit Publik Shkup, Besim Kokën, i cili thotë se së shpejti do shpallin konkurs.
“Pasi që ka ndërruar jetë doktoresha në fshatin Sfillare, pas procedurave për mbylljen e koncesionit e kemi kaluar në bordin drejtues dhe e kemi dërguar në Ministri të Shëndetësisë. Të hënën e shpallim konkursin në Gazetën Zyrtare dhe brenda një muaji do të mbarojë procedura për koncesion të ri”, deklaroi Besim Koka, drejtor i Shtëpisë së Shëndetit Publik.
Deri para gjysmë viti, kjo ambulancë ka punuar me një staf infermierësh për të kryer nevojat bazë shëndetësore të pacientëve. /tv21/
