Të gjithë liderët e partive kryesore të shqiptarëve ishin dje në Prishtinë: Ali Ahmeti ishte mysafir në servilin publik RTK, dhe tre liderët e opozitës shqiptare, Lidhjes Evropiane për Ndryshim – Izet Mexhiti, Afrim Gashi dhe Bilal Kasami, si dhe Kryetari i Aleancës për Shqiptarët, Arben Taravari, kanë qenë në një takim me kryeministrin e Kosovës, Albin Kurti. Në takim ata shprehën propozimin e tyre për President të Maqedonisë së Veriut, i cili duhet të jetë nga radhët e shqiptarëve. Një foto dhe njoftim për takimin, në të cilin ka marrë pjesë edhe këshilltari i Kurtit për Maqedoninë e Veriut, Bekim Qoku, është publikuar në ueb faqen zyrtare të Qeverisë së Kosovës. Siç u tha, u diskutua për situatën në rajonin e Ballkanit, fqinjësinë e mirë dhe perspektivën e partneritetit ndërmjet Kosovës dhe Maqedonisë së Veriut, situatën sociale dhe ekonomike të komunitetit shqiptar në Maqedoni, nevojën për demokraci dhe stabilitet dhe përmirësimin e marrëdhënieve mes komuniteteve etnike, diçka për të cilën vetë Kosova është shembull, por edhe e promovon dhe e përkrah. “Katër liderët shprehën propozimin e tyre për një president të Maqedonisë së Veriut, i cili do të mishërojë bashkëjetesën mes grupeve etnike dhe do të garantojë rrugën evropiane të Maqedonisë së Veriut, një president që këtë herë duhet të vijë nga radhët e shqiptarëve”, thuhet në njoftim.
DE JURE-JO, DE FAKTO-PO!
Lajmi se Arben Taravari është në të njëjtën tavolinë me liderët e LEN te kryeministri i Kosovës dhe se në Prishtinë mund të planifikohet forcimi i frontit të opozitës me Aleancën për Shqiptarët, e riktheu në skenë çështjen e rolit të Vetëvendosjes të udhëhequr nga Kurti në zgjedhjet në Maqedoni. Kryetari i Lëvizjes Demokratike, Izet Mexhiti, i cili vitin e kaluar e shpalli Vetëvendosjen si “partneri i katërt në LEN opozitare”, ka shpjeguar në disa raste se Vetëvendosje nuk është parti e regjistruar në RMV dhe “de jure” nuk mund të jetë pjesëmarrës në zgjedhje, por “de facto” do të marrë pjesë përmes kuadrove partiake që janë edhe qytetarë të Maqedonisë, si për shembull këshilltari i Kurtit, Bekim Qoku.
Lideri i BDI-së, Ali Ahmeti i ka trajtuar këto aspekte në emisionin “RTK Prime”, ku ka komentuar takimin e djeshëm te Kurtit si dhe përfshirjen e Vetëvendosjes në zgjedhjet e 8 majit. Sipas Ahmetit, nëse Lëvizja Vetëvendosje e Kurtit planifikon të marrë pjesë në zgjedhjet e RMV-së, këtë duhet ta thotë hapur.
“Ajo që tha Mexhiti nuk përputhet me deklaratën e Kurtit në Shkup, i cili tha se Lëvizja Vetëvendosje nuk po merr pjesë në këto zgjedhje. Nëse ka një strategji për të kamufluar gjërat, nuk është mirë, t’i themi gjërat hapur”, tha Ahmeti. I pyetur nëse përfshirja “de fakto” e Vetëvendosjes në zgjedhjet në Maqedoninë e Veriut do të ndikojë në rezultatet zgjedhore, Ahmeti tha se nuk mund të ndikojë në rezultat, sepse elektorati shqiptar në Maqedoni është mjaft i përcaktuar. Ai ka deklaruar se BDI është fituese e zgjedhjeve edhe para mbajtjes së tyre dhe se këtë e kanë ditur edhe opozita maqedonase edhe ajo shqiptare. Por ai vuri në dukje edhe dëmin e copëtimit të votave të shqiptarëve. “Shqiptarët në Maqedoninë e Veriut nuk kanë nevojë për 3, 4, 5, 6 apo 7 parti, sepse sa më shumë parti të ketë, atëherë shqiptarët do të jenë më pak të rëndësishëm”, thekson Ahmeti.
KONSOLIDIMI I OPOZITËS
Duke folur për takimin e djeshëm të Kurti, Izet Mexhiti në një prononcim për mediat e Kosovës, ka konfirmuar pjesëmarrjen e Vetëvendosjes në zgjedhjet e RMV-së përmes pjesëmarrjes personale. “Sa i përket Lëvizjes Vetëvendosje, ajo nuk është e regjistruar si subjekt në Maqedoninë e Veriut dhe de jure nuk funksionon, por do të kemi një listë të përbashkët të deputetëve brenda Lidhjes Evropiane për Ndryshim. Vetëvendosje është pjesë e LEN. Jemi duke punuar në platformën për zgjedhjet e ardhshme parlamentare, ku marrin pjesë edhe ekspertë të Vetëvendosjes si Arbër Zaimi, Elvis Hoxha dhe Bekim Qoku. Tashmë jemi të sinkronizuar për ndërtimin e platformës, për listat dhe për fushatën e përbashkët”, tha Mexhiti. Sipas tij, shumica dërrmuese e shqiptarëve në Maqedoninë e Veriut janë të pakënaqur me subjektin që është në qeveri për më shumë se 20 vjet. Më parë ka munguar konsolidimi dhe bashkimi i opozitës, por tani fronti opozitar përbëhet nga katër subjekte politike.
Por, a do t’i bashkohet partneri i pestë pas takimit te Kurti? Aleanca për Shqiptarët nuk ka vendosur zyrtarisht se si do të marrë pjesë në zgjedhje – në mënyrë të pavarur, me frontin opozitar apo me BDI. Mexhiti në disa raste ka theksuar se “performanca e pavarur” e partive individuale të shqiptarëve praktikisht nënkupton përcaktim “për BDI-në”. Për momentin, Aleanca për Shqiptarët dominohet formalisht nga pikëpamjet për paraqitjen e pavarur, në dukje neutrale, por nuk është marrë një vendim përfundimtar. Është e sigurt se në ASH janë dy krahë, njëri prej të cilëve është i interesuar për bashkëpunim me BDI-në dhe tjetri në bashkëpunim me opozitën. Më herët mediat në gjuhën shqipe raportuan se emri i Taravarit po përmendej si kandidat për president të opozitës, pra si partneri i pestë në LEN, qoftë edhe personalisht.
BASHKIMI I OPOZITËS NËN PATRONAZHIN E ALBIN KURTIT
Së pari takimi i liderëve të opozitës shqiptare bashkë me kryetarin e Aleancës për Shqiptarët, Arben Taravari në Prishtinë është një sinjal që në këto zgjedhje gjithë spektri opozitarë në Maqedoni mundë të garojnë në një listë të përbashkët kundër BDI-së, thotë politologu Murat Aliu. Sipas tij, atë që mësuam nga ky takim i djeshëm është se bashkimi i opozitës në vend definitivisht ndodh nën patronazhin kryeministrit të Kosovës, Albin Kurti, i cili ka vëndosur që ta shtrij ndikimin e tij politik dhe kombëtarë edhe jashtë kufijve të Kosovës, përkatësisht në Maqedoni.
“Ndërkaq më e rëndësishmja që mësuam nga ky takim është se kësaj herëe, mbase për herë të parë pas shumë kohës, opozita do të ketë një rrëfim apo narrativ të sajin autentik me të cilin do të mundë t’i konkurroj rrëfimit të partisë në pushtet BDI, e cila sipas gjitha gjasave rrëfimin kryesorë në këto zgjedhje do ta ketë sërish kryeministrin shqiptarë. Pra, shikuar në këtë optikë, ideja për president shqiptarë është një ide e cila do ta bëj më konkurruese opozitën, mbase edhe fituese në zgjedhjet e 8 Majit këtu në vend. Sepse tani opozita do duket disi e barazuar me partinë në pushtet si në planin kadrovik po ashtu edhe në plan diskursiv”, ka deklaruar për KOHA, Murat Aliu, politolog.
HISTORIKE ZGJEDHJA E XHAFERIT
Ahmeti në intervistën e djeshme për RTK-në e ka quajtur “historik” aktin e zgjedhjes së Talat Xhaferit për kryeministër, dhe e ka vlerësuar si “të gabuar” dhe “shpreh keqardhjen” për mospjesëmarrjen e partive opozitare shqiptare në votimin për ato zgjedhje. Nga ana tjetër Izet Mexhiti ka thënë se kanë një muaj që po bojkotojnë Parlamentin, pasi Talat Xhaferi si kryeparlamentar ka penguar përfshirjen e një deputeti të partive opozitare shqiptare në KSHZ.
