“Ekziston një shaka në statistikë – nëse i torturon mjaftueshëm të dhënat, ata do të pranojnë çfarë të duash. Duket se VMRO e ka kuptuar fjalë për fjale, kështu që po përpiqen me të gjitha forcat të tregojnë se kanë rezultate të mira kur bëhet fjalë për pagat dhe inflacionin,” thotë profesori Branimir Jovanoviq për CIVIL Media, pas përpjekjeve të VMRO DPMNE për të manipuluar numrat për të vërtetuar se njerëzit janë më të pasur sot sesa ishin gjatë epokës së LSDM-së, përcjell Nistori.
Në vijim, profesori Jovanoviq ofron disa shifra të thjeshta, në mënyrë që qytetarët të gjykojnë vetë.
Paga mesatare në qershor të vitit të kaluar, muaji i fundit para se VMRO të vinte në pushtet, ishte 41,939 denarë. Një vit më vonë, në qershor të vitit 2025, paga mesatare është 45,468 denarë, ose rreth 3,500 denarë më shumë.
Paga minimale para se VMRO të vinte në pushtet ishte 22,567 denarë, tani është 24,379 denarë, ose rreth 1,800 denarë më shumë.
Gjatë së njëjtës periudhë – nga qershori i vitit të kaluar deri në qershor të këtij viti – shporta minimale e konsumatorit u rrit nga 60,325 denarë në 64,698 denarë, ose rreth 4,300 denarë. Kjo është më shumë se rritja e pagës mesatare dhe rritja e dy pagave minimale.
“Absolutisht nuk mund të bëhet fjalë për përmirësim të standardit të jetesës. Ose ja, nëse flasim me përqindje. Rritja e pagave nominale në qershor të vitit të kaluar, para se VMRO të vinte në pushtet, ishte rreth 15%. Një vit më vonë, ajo u përgjysmua, në rreth 8%,” thotë Jovanoviq.
Trendi në rënie është edhe më i dukshëm në pagën reale, ose pagën e përshtatur për inflacionin.
“Vitin e kaluar në qershor pati një rritje prej 11%, tani ka rënë në më pak se 4%,” shton ai.
“Nëse flasim për inflacionin, qershorin e kaluar, para se VMRO të vinte në pushtet, ishte 3.2%. Sot, një vit më vonë, është pothuajse 5%.”
“Dhe i them të gjitha këto si dikush që ka kritikuar vazhdimisht LSDM-në gjatë viteve të fundit për mënyrën se si e kanë trajtuar inflacionin. Pra, do t’u jepja njerëzve të VMRO-së një këshillë me qëllime të mira. Në vend që të debatojnë me SDSM-në, e cila kishte shifra më të mira për inflacionin dhe pagat, le të bëjnë diçka për të rritur vërtet pagat dhe për ta vënë inflacionin nën kontroll. Dhe këtë mund ta arrijnë më së miri duke rritur pagën minimale dhe pagat në sektorin publik, si dhe duke ngrirë çmimet,” është i vendosur Profesor Jovanoviq. /Nistori/
