Koordinatori i Kovid qendrës në Tetovë, Gëzim Nuredini deklaroi sot se në mesin e viktimave nga zjarri në Spitalin modular, kishte edhe 2 civilë, të cilët nuk kanë qenë pacientë. Megjithëse sipas protokolleve është rreptësishtë e ndaluar vizita e pacientëve të infektuar me Kovid-19. Në mesin e viktimave kishte edhe një mjek që punonte në një institucion shëndetësor privat dhe për fat të keq edhe ai ka ndërruar jetë.
“Pacientët e shpëtuar janë në numër 12, dhe të gjithë janë mirë. Pacientët e shpëtuar nuk kanë lëndime trupore dhe janë në gjendje të mirë. Kemi 57 pacientë të hospitalizuar, për kontroll kemi 36 pacient dhe fatkeqësisht edhe një viktimë i lindur në vitin 1949”, tha Nuredini.
Gëzim Nuredini, deklaroi sot se identifikimi i disa viktimave po shkon me vështirësi dhe se për to duhet të bëhet analiza e ADN-së. Ai apeloi deri tek familjarët për durim, dhe njoftoi se kufomat do tua dërgojnë deri në shtëpi.
A ka pasur kamera vëzhgimi në spitalin kovid në Tetovë, flet koordinatori i Qendrës?
Regjistrimet nga kamerat e vëzhgimit të vendosura në qendrën covid të djegur në Tetovë i janë dorëzuar Prokurorisë, tha në përgjigje të pyetjes së një gazetari koordinatori i qendrës për covid, Gezim Nuredini. Ai shtoi se kishte zjarrfikës në qendër.
“Ka kamera vëzhgimi, nga ana dhe nga përpara, dhe materialet i janë dorëzuar prokurorit publik,” tha Nuredini.