KF Shkëndija e siguroi titullin e kampionit të sivjetëm të futbollit në LPFRMV

Me fitoren e sotme prej 3-1 ndaj Borecit, KF Shkëndija nga Tetova e ka siguruar matematikisht titullin e kampionit për sezonin 2020/2021.

Tetovarët kanë siguruar titullin e katërt në histori, me 13 pikë diferencë ndaj vendit të dytë Shkupit, raporton Nistori, ndërkaq deri në përmbyllje të kampionatit kanë mbetur edhe katër javë.

Për fitoren e sotme të kuqezinjve shënuan Murati, Ibraimi dhe Hebaj, kurse Bejtullai “i dhuroi” një gol Borecit, duke shënuar autogol.

Tifogrupi i Shkëndijës, “Ballistët” dhuruan spektakël jasht stadiumit, duke brohoritur, kënduar e ndezuar flakadanë. Në këtë mënyrë, ata shprehën mbështetjen dhe dashurinë që e kanë për këtë klub, si dhe për kompaninë Ecolog dhe afaristin tetovar, Lazim Destani.

Situata e shkaktuar nga pandemia Covid-19 dhe masat për parandalimin e përhapjes nuk lejuan që këta tifozë të jenë në tribunën “Marshin Beqiri”. Kjo ndeshje u ndoq edhe nga ish-kapiteni i Kombëtares Shqiptare, Lorik Cana.

Ndryshe, ndeshjen e radhës Shkëndija si mysafirë do ta luajë në Shkup ndaj Rabotniçkit (28 prill, ora 13:00).

Fotot e ndeshjes dhe të festës i gjeni në galerinë e mëposhtme.