Dy shqiptarë të Kosovës kanë vendosur t’i bashkohen luftës së Ukrainës kundër Rusisë. Aliq Beluli dhe Ismet Shala janë dy qytetarët e parë të Kosovës që kanë deklaruar për Kanal10 shkuarjen në Ukrainë për të luftuar. Ata vijnë nga Komuna e Suharekës. Arsyet e shkuarjes në Ukrainë janë pamjet e tmerrshme që i shohin çdo ditë në Ukrainë dhe se Rusia është armik shekullor i shqiptarëve, përcjell Nistori.
Aliq Beluli: Arsyet janë thjeshtë humane. Na kanë prek këto pamje. Një armik të përbashkët, këto janë. Ne po japim shembull.
Ismet Shala: Siç dihet, si krejt shtetet e Bashkimit Europian e kanë përkrahë këtë luftë. Kem qejf me u solidarizu edhe na, meqenëse dihet arsyeja politike. Si ana e Rusisë – armik i përbashkët. Poashtu edhe Ukraina, ndoshta do të lëvizë, do të na përkrahë si shtet.
Të pyetur nga gazetari nëse kanë përvojë ushtarake, ata u përgjigjën:
Aliq Beluli: Kemi disa përvoja pak. Unë kam qëndruar gjatë luftës në Kosovë. Nuk kam marrë pjesë në luftë, por kam qëndruar aty gjatë luftës. Përvojën e shërbimit ushtarak të ish-Jugosllavisë e kam.
Ismet Shala: Jo, nuk kam qenë ushtar i Jugosllavisë, por përvoja e luftës së Kosovës na ka njoftu të gjithve si të rinj, çfarë kushtesh. Siç po shihet, kjo gjende ka qenë edhe te ne.
Rusia ka nisur pushtimin e paprovokuar të Ukrainës më 24 shkurt. Presidenti rus, Vladimir Putin, e ka cilësuar si “operacion special”. Perëndimi e ka dënuar ashpër pushtimin dhe ka vendosur një varg sanksionesh të rënda kundër Rusisë. /Nistori/