Kryeministri i Maqedonisë së Veriut, Dimitar Kovaçevski thotë se formalisht ende nuk e kanë pranuar propozimin e Francës, të harmonizuar nga ana e 27 vendeve-anëtare të BE-së. Ai thekson se çfarëdo që të jetë teksti i harmonizuar përfundimtar, duhet të plotësohen disa kushte që i njëjti të jetë i pranueshëm për Qeverinë e Maqedonisë, përcjell Nistori.
“Lidhur me diskutimin publik për propozimin francez, dëshiroj të rikonfirmoj se Qeveria e Republikës së Maqedonisë Veriore nuk ka pranuar zyrtarisht një propozim i cili është i harmonizuar në nivelin e të 27 shteteve anëtare. Sido që të jetë teksti përfundimtar i harmonizuar i propozimit francez, theksoj se, në mënyrë që ai të jetë i pranueshëm për ne, elementët e mëposhtëm janë thelbësorë:
➡️ Formulimi i pastër i gjuhës maqedonase në kornizën negociuese dhe mbrojtje e qartë e identitetit maqedonas;
➡️ Çështjet historike nuk mund të jenë kriter në kuadrin e negociatave;
➡️ Negociatat ndërmjet Maqedonisë së Veriut dhe BE-së duhet të fillojnë para fillimit të procedurës për ndryshime kushtetuese për përfshirjen e bullgarëve, kroatëve dhe malazezëve në preambulën e Kushtetutës;
➡️ Garanci të forta si nga Bullgaria ashtu edhe nga Bashkimi Europian se Bullgaria nuk do të kushtëzojë kërkesat e reja me atë që do të bihet dakord në kuadrin e negociatave dhe protokollin dypalësh që ende nuk është harmonizuar me Bullgarinë;
➡️ Çdo zgjidhje do të duhet të konsultohet me institucionet e Republikës së Maqedonisë së Veriut.” – shkruan Kovaçevski në Facebook.
Ndryshe, Borisov tha sot se GERB do të japë “dritën jeshile” për fillimin e bisedimeve të anëtarësimit në BE me Maqedoninë e Veriut dhe Shqipërinë dhe se propozimi frances për momentin është më i miri. /Nistori/
