Kuvendi zgjodhi tre nga pesë nënkryetarët e institucionit ligjvënës aq sa kishte parashikuar. Jovan Mitrevski i LSDM-së, Antonio Milloshovski i VMRO-DPMNE-së dhe Vesna Bendevska e partisë ZNAM do të jenë zëvendës të kryetarit Afrim Gashi. Në deklaratën solemne, deputeti Milloshovski nuk u paraqit për arsye shëndetësore, ndërsa deputetja Bendevska nuk e tha emrin kushtetues Republika e Maqedonisë së Veriut.
“Deklaroj se funksionin nënkryetar i Kuvendit të “R.S Makedonija” do ta kryej me nderë dhe përgjegjësi dhe do t’i respektoj ligjet dhe Kushtetutën e “R.S Makedonija”.
Komisioni për zgjedhje dhe emërime miratoi edhe vendimin për apanazh për 36 deputetët nga përbërja e kaluar të cilët do të marrin rrogë rreth 1800 euro gjatë periudhës 6-12 muaj.
Kryeministrit teknik, Talat Xhaferi njëkohësisht edhe deputet i Frontit Evropian i është caktuar vendimi që rrogën e muajit në vijim ta merr nga Kuvendi dhe jo nga Qeveria. Ndërkohë ish funksionarët e Qeverisë së kaluar, ministra dhe zëvendësministra që të gjithë kanë kërkuar apanazh në përputhje me ligjin.
Komisioni i miratoi edhe nga dy rroga deputetëve nga përbërjet e kaluara të cilët këtë vit kanë plotësuar kushtin e pensionit. /Alsat/
