Shqetësimet që kanë shtetasit të Maqedonisë së Veriut në lidhje me dokumentet e udhëtimit, sidomos pasaportat, janë një shqetësim shumë i madh edhe për mërgimtarët dibranë. Ata janë në numër shumë të madh në SHBA dhe në shumë shtete të Evropës. Shoqatat të mërgimtarëve dibran këto ditë informojnë se problemi i pasaportave është një problem shumë serioz meqë drejtpërdrejt mund të ndikojë edhe në bllokimin e udhëtimeve të tyre drejt vendlindjes. Përveç pasaportave që kanë të shteteve ku ata jetojnë, ata kanë edhe pasaporta të shtetit amë – Maqedonisë së Veriut. Për të siguruar pasaporta me emrin e ri të shtetit në mërgim, është shumë rëndë meqë ata nuk kanë kohë dhe mundësi që të enden nëpër Ambasadat dhe Konsullatat të Maqedonisë së Veriut sepse jetojnë në largësi të mëdha.
Prandaj me të drejt, siç thonë shoqatat, ekziston frika se a mund të bllokohet udhëtimi drejt vendlindjes nëse mërgimtarët nuk kanë pasaporta të reja. Sipas burimeve të njëjta mbi 90 për qind të mërgimtarëve që janë shtetas të Maqedonisë së Veriut e që jetojnë në Amerikë dhe Evropë nuk kanë pasaporta me emrin e ri dhe posedojnë vetëm pasaporta me emrin Republika e Maqedonisë. Pyetja kryesore që këto ditë bëhet nga mërgimtarët është se a mund të udhëtojnë drejt Maqedonisë së Veriut me pasaportat me emrin e vjetër të shtetit.
Në bisedat që patëm me udhëheqësit e shoqatave dibrane që veprojnë në SHBA nëpërmjet linjave telefonike u informuam se edhe këtë verë nga SHBA-ja drejt Dibrës përgatiten që të vijnë mbi 6 mijë dibranë. Pothuajse të gjithë kanë pasaporta me emrin e vjetër të shtetit-Republika e Maqedonisë. Ata paraqiten dhe pyesin në shoqatën atdhetare “Dibra” me seli në Nju Jork, a do të kenë probleme për të ardhur në atdhe me pasaportat e vjetra. Burimi i njëjtë potencon se shoqatat janë në pritje të përgjigjes nga institucionet diplomatike të Maqedonisë së Veriut që funksionojnë në SHBA.
Do të ishte një problem shumë i madh nëse kërkohet që ata të marrin pasaporta me emrin e ri meqë dibranët jetojnë në shumë shtete të SHBA-ve duke filluar nga Nju Jorku, Nju Xhersi, Teksasi, Alaska, Arizona etj. Është e pamundshme që para ardhjes në atdhe të nxjerrin pasaporta me emrin e ri të vendit tonë. Shoqatat në fjalë informojnë se në SHBA jetojnë afro 20 mijë dibranë
Problemi është i njëjtë edhe mes mërgimtarëve dibranë që jetojnë dhe punojnë në shtete të Evropës. Në Itali, Austri, Zvicër, Gjermani, Francë dhe shtete skandinave, sipas shoqatave dibrane që veprojnë atje ka mijëra dibranë. Edhe shoqatat janë të shqetësuar për mënyrën e ardhjes të mërgimtarëve në vendlindje. Prandaj me të drejtë kërkojnë nga autoritet të Maqedonisë së Veriut t’ju mundësojë ardhje në vendlindje me pasaportat me emrin e vjetër. Përndryshe do të mbeten të bllokuar dhe me pamundësi për të ardhur në Maqedoninë e Veriut disa mijëra mërgimtar dibranë por jo vetëm ata. Prandaj pritet që autoritetet e Maqedonisë së Veriut në mënyrë të qartë t’ua sqarojnë mërgimtarëve dibran por edhe mërgimtareve të tjerë se si mund të udhëtojnë drejt vendlindjes gjatë muajve në vijim. /Koha/
