Vala e re e nxënësve po fillon të shpërthejë në gjysmëvjetorin e dytë. Nëpër shkollat e të gjithë vendit, nxënësit po ndryshojnë shkollë dhe hapin rrugën për aventurën e re të mësimit. Nga shumë shkolla të vendit kanë reaguar se gjatë fillimit të gjysmëvjetorit të dytë janë vërejtur shumë mungesa nëpër banka shkollore. Zyrtarët nga sektori i arsimit të komunës së Kumanovës njoftuan se gjysmëvjetori i dytë ka filluar me 13.785 nxënës të shkollave fillore dhe të mesme komunale. Nga atje thanë se procesi i migrimit ka bërë që nxënësit e këtyre shkollave të komunës më të madhe në vend të boshatisin bankat shkollore si dhe të ulin dukshëm numrin e nxënësve në shkolla.
“Ka një ulje të lehtë në numrin e studentëve, do të bëjmë një shkurtim të ri në fund të janarit. Procesi i migrimit nuk ndalet. Kumanova është komuna më e madhe me 21 shkolla dhe ndoshta me numrin më të madh të nxënësve, por po përballemi edhe me migrimin në vendet e Evropës Perëndimore”, tha shefi i sektorit, Aleksandar Jovanoviç. Ai përmendi se në gjysmëvjetorin e dytë, numri i nxënësve në shkollat fillore është 9.873 dhe në shkollat e mesme 3.912 nxënës.
Nga ana tjetër, edhe me fillimin e gjysmëvjetorit të dytë në Shtip, 50 nxënës nga shkollat fillore dhe të mesme migruan për në vendet evropiane së bashku me prindërit e tyre. Shefja e Departamentit të Arsimit në Komunën e Shtipit, Snezhana Saneva, thotë se ky numër nuk është i vogël. Sipas të dhënave të shkollave, në gjysmën e dytë të vitit do të ketë 26 nxënës më pak në shkollat e mesme, ndërsa në shkollat fillore ky numër është 24.
“Pra në nivel komunal janë gjithsej 50 nxënës, të cilët nuk do të vijojnë më mësimet. Ndryshe, le të themi nga shkolla fillore komunale “Goce Dellçev” kemi mungesë të raportuar, por aty prindërit ende nuk kanë shpjeguar pse fëmijët nuk vijojnë mësimin, ai numër është diku rreth 25 nxënës dhe të shpresojmë që këtë gjysmëvjetor të dytë do të vazhdojnë me mësimin, do të kthehen në bankat shkollore dhe do ta përfundojnë vitin shkollor rregullisht”, tha Saneva.
Ajo theksoi se nuk ka asnjë shkollë që po rikthehet veçanërisht, gjegjësisht numri i nxënësve që janë larguar jashtë vendit në këtë gjysmëvjetor të dytë sillet nga shtatë deri në dhjetë nxënës në secilën shkollë të Shtipit. Ndërkaq në Shtip, vitin e kaluar 81 nxënës nuk e kanë nisur mësimin në gjysmën e dytë të vitit, pra prindërit kanë kërkuar vërtetime për dalje jashtë vendit. Saneva theksoi se nga sot orët e mësimit po vazhdojnë normalisht në të gjitha shkollat fillore dhe të mesme në Shtip, transporti publik i qytetit funksionon, kurse klasat janë të ngrohura për mësim normal. /Koha/
