Në konferencën e djeshme për shtyp, Ministri i Shëndetësisë, Azir Aliu, deklaroi se nuk ka informacion të saktë se sa mjekë punojnë pa licencë në vend. Kjo deklaratë erdhi pasi u pyet për rastin e një mjeku nga Struga, i cili kishte punuar për vite me radhë në spitalin e qytetit pa pasur leje pune të vlefshme, shkruan Faktor, përcjell Nistori.
“Do ta them publikisht: nuk kam një shifër të saktë për numrin e mjekëve që punojnë në institucionet shëndetësore të vendit. Në një sistem të tillë, nëse një mjek është shfaqur në Strugë, supozoj se ka edhe në qytete të tjera”, u shpreh Aliu.
Ai shtoi se një situatë e tillë mund të parandalohet vetëm përmes një analize funksionale, e cila do të tregojë se sa staf mjekësor është realisht në punë dhe sa është nevoja.
“Nuk kam ende një numër të qartë. Kur them ‘i qartë dhe preciz’, dua të them një shifër të saktë — jo plus një ose minus një. Derisa të arrijmë në këtë pikë, po e them publikisht: nuk e di numrin e saktë të mjekëve. Dhe kur nuk e di këtë numër, është e mundur të ketë edhe më shumë raste të ngjashme. Nëse një është zbuluar, mund të ketë edhe të tjerë në qytete të tjera”, tha ai.
Për referencë, mjeku 42-vjeçar nga Struga ka punuar për pesë vite dhe ka marrë pagë rregullisht, pa qenë i pajisur me licencën përkatëse. /Nistori/
