Ministrja e Arsimit dhe Shkencës, Vesna Janevska, deklaroi sot se situata në Fakultetin e Filozofisë është shumë e ndërlikuar dhe se nuk është kompetente të thotë nëse ndonjë nga stafi do të mbahet përgjegjës, përcjell Nistori.
“Ka institucione të tjera në vend për këtë. Shpresoj që procedura të zhvillohet siç duhet. Do të doja të besoja se ky është një rast i izoluar dhe se nuk është bërë me qëllim, por pikërisht për këtë institucionet përkatëse do të japin fjalën e tyre dhe, sipas vendimeve të tyre, do të veprohet”, tha Janevska pas inspektimit të aktiviteteve ndërtimore në Shkollën Fillore “Krum Toshev” në fshatin Trubarevë.
E pyetur nëse do të anulohen diplomat e të diplomuarve në master, ajo tha se ende pret raportin, por nëse regjistrimet anulohen, atëherë do të anulohen edhe diplomat.
Drejtuesit e Fakultetit të Filozofisë në Universitetin “Shën Kirili dhe Metodi” në Shkup njoftuan dje në një konferencë për shtyp se shtatë studentëve të studimeve master dhe katër të studimeve të doktoraturës u është anuluar regjistrimi dhe statusi i studentit, përkatësisht u janë ndërprerë studimet. Bëhet fjalë për studentë që kishin përfunduar studime profesionale trevjeçare.
Ata theksuan se respektojnë dhe zbatojnë përfundimet e Inspektoratit Shtetëror të Arsimit, i cili gjatë mbikëqyrjes konstatoi parregullsi në regjistrimin e këtyre studentëve dhe mori vendim për ndërprerjen e studimeve të tyre.
Dekani i Fakultetit të Filozofisë, Oliver Bakreski, deklaroi se studentët nuk janë pa diplomë, por se nuk është respektuar ligji, i cili përcakton se vetëm me studime akademike — dhe jo me studime profesionale — mund të vazhdohet në cikle më të larta. Në këtë rast, studimet profesionale janë trajtuar njësoj si studimet akademike, duke u lejuar studentëve të regjistrohen në ciklin e dytë dhe të tretë, ndonëse kjo nuk lejohet sipas ligjit në fuqi që nga viti 2018.
Studenti i parë pasuniversitar me diplomë profesionale trevjeçare është regjistruar në vitin 2019. Deri më tani, askush nuk ka marrë doktoraturë, ndërsa tetë persona kanë marrë diplomë master nga studime profesionale njëvjeçare. Ende nuk ka vendim nga Inspektorati nëse këto diploma do të mbeten të vlefshme.
Janevska deklaroi edhe më herët se Fakulteti i Filozofisë duhet të veprojë sipas përfundimeve të Inspektoratit, i cili konstatoi parregullsi gjatë mbikëqyrjes së regjistrimeve në studimet master dhe doktoraturë.
Ajo shtoi se pritet raporti përfundimtar, pas të cilit do të merret vendimi përfundimtar për këtë rast. /Nistori/
